ལེའུ་དགུ་པ། ནད་ཀྱི་རྐྱེན་བསྟན་པ།

ནད་ཀྱི་རྒྱུ་བསྟན་ཟིན་པའི་རྗེས་སུ་བྱ་བ་གཞན་གྱིས་བར་མ་ཆོད་པར་དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །དེ་ཡང་ཀྱེ་ཞེས་བོས་ནས་དྲང་སྲོང་ཆེན་པོ་ཡིད་ལས་སྐྱེས་ལ་སོགས་པའི་འཁོར་རྣམས་ལེགས་པར་ཉོན་ལ་ཡིད་ལ་ཟུངས་ཤིག་དང༌། བཤད་མ་ཐག་པའི་ནད་ཀྱི་རྒྱུ་དེ་ལྟ་བུ་ལ་ཟུག་རྔུ་མངོན་གྱུར་དུ་སྐྱེད་པར་བྱེད་པའི་རྐྱེན་ནི་དུ་ཙམ་ཡོད་སྙམ་ན་རྣམ་པ་གསུམ་དུ་ཡོད་དེ། སྐྱེ་མཆེད་དང༌། གསོག་ལྡང་དང༌། སློང་རྐྱེན་དངོས་ཏེ་རྣམ་པ་གསུམ་མོ། །སྐྱེ་མཆེད་དང་གསོག་ལྡང་ནད་ཀྱི་རྐྱེན་དུ་འགྱུར་བ་ཅི་ཡིན་ནམ་སྙམ་ན་ནད་ཀྱི་རྣམ་པ་མང་དུ་སྐྱེ་ཞིང་སྟོབས་འཕེལ་བའམ་མཆེད་པར་བྱེད་པས་ན་སྐྱེ་མཆེད་ཅེས་པ་དང༌། ནད་ལྐོག་གྱུར་དུ་གསོག་ཅིང་མངོན་གྱུར་དུ་ལྡང་བར་བྱེད་པས་ན་གསོག་ལྡང་ཞེས་པ་གཉིས་ཀྱང་ནད་སློང་བའི་རྐྱེན་དུ་ཅི་ནས་ཀྱང་རིགས་ཤིང༌། རྐྱེན་དངོས་ནི་ནད་ལྐོག་གྱུར་དུ་བསགས་པ་རྣམས་མངོན་སུམ་སློང་བར་བྱེད་པས་ན་སློང་རྐྱེན་སྨོས་པ་ཡིན་པས་རྐྱེན་དེ་གསུམ་དུ་ཤེས་པར་བྱའོ།།

ནད་ཀྱི་སློང་རྐྱེན་གསུམ་གྱི་ནང་ནས་དང་པོ་སྐྱེ་མཆེད་ཅེས་པ་ནི་དུས་དང་དབང་པོ་དང་སྤྱོད་ལམ་རྣམས་དམན་ལྷག་ལོག་པ་ལས་ནད་རྣམས་སྐྱེད་པར་བྱེད་པ་ཡིན་ནོ། །སྐྱེ་ཞིང་མཆེད་པར་བྱེད་པའི་སློང་རྐྱེན་ལས་དུས་དམན་ལྷག་ལོག་པ་ཞེས་བྱ་བ་ནི་ཚ་བའི་དུས་སོས་ཀ་དང༌། གྲང་བའི་དུས་དགུན་དང༌། ཆར་གྱི་དུས་དབྱར་གསུམ་དམན་པ་ནི་རིམ་པ་བཞིན་དུ་ཚ་བའི་ཤས་ཆུང་བ་དང༌། གྲང་བའི་ཤས་ཆུང་བ་དང་ཆར་པ་ཆུང་བ་སྟེ། དེ་བཞིན་དུ་ལྷག་པ་ནི་ཚ་བ་དང༌། གྲང་བ་དང༌། ཆར་པ་རྣམས་ཆེ་དྲག་པ་ལ་བྱ་ལ། ལོག་པ་ནི་དུས་དེ་གསུམ་གྱི་སྐབས་སུ་ཚ་གྲང་ཆར་གསུམ་མེད་པ་ཞེས་བྱ་སྟེ་ཅུང་ཟད་དམན་པ་ཙམ་ལ་མི་བྱའོ། །ཤུགས་ལས་དུས་དེ་གསུམ་གྱི་ཚེ་རང་རང་གི་གནས་ལུགས་དང་མཐུན་པར་ཚ་གྲང་ཆར་གསུམ་སྙོམས་པར་འབྱུང་བ་ནི་དམན་ལྷག་ལོག་གསུམ་དང་བྲལ་བ་ཞེས་བྱ་སྟེ་ནད་མེད་པའི་རྒྱུའི་གཙོ་བོ་ཡིན་ནོ། །སྐྱེ་མཆེད་ཀྱི་སློང་རྐྱེན་གྱི་ནང་ནས་དབང་པོ་དམན་ལྷག་ལོག་པ་ཞེས་བྱ་བ་ནི་མིག་ལ་སོགས་པའི་དབང་པོ་ལྔ་དང་དེའི་ཡུལ་གཟུགས་ལ་སོགས་པ་ལྔ་པོ་རྣམས་ལྷན་ཅིག་བྱེད་པའི་རྐྱེན་གྱིས་ཕྲད་པ་ན་གཟུགས་སྒྲ་དྲི་རོ་རེག་བྱ་རྣམས་ཤིན་ཏུ་ཆུང་ངམ། ཡང་ན་ཡུལ་དེ་རྣམས་ལ་དབང་པོ་རྣམས་སོ་སོར་མི་སྦྱོར་བ་ནི་དམན་པ་ཞེས་བྱ་བ་ཡིན་ཏེ། དེ་བཞིན་དུ་དབང་པོ་རྣམས་རང་རང་གི་ཡུལ་ལྷག་པར་གཟིར་ཞིང་ཤས་ཆེར་གཏད་དྲགས་པ་ནི་ལྷག་པ་ཞེས་བྱ་བའི་སྦྱོར་བ་ཡིན་ལ། ཡུལ་ལྔ་པོ་དབང་པོ་རྣམས་དང་ཤིན་ཏུ་ཉེ་བ་དང༌། ཡང་ན་ཤིན་ཏུ་རིང་བ་དང༌། དེ་བཞིན་དུ་ཧ་ཅང་ཆེ་དྲགས་པའམ་ཆུང་དྲགས་པ་དང༌། འཇིགས་སུ་རུང་བ་དང་ཤིན་ཏུ་མི་སྡུག་པའི་གཟུགས་སྒྲ་ལ་སོགས་པ་ལ་ལོངས་སྤྱོད་པ་ནི་ལོག་པའི་སྦྱོར་བ་ཞེས་བྱ་སྟེ། དེ་ལྟ་བུ་ཡང་ནད་ཀྱི་རྐྱེན་ཞེས་བྱ་བར་བཤད་པ་ཡིན་ནོ། སློང་རྐྱེན་སྐྱེ་མཆེད་ཀྱི་ནང་ནས་སྤྱོད་ལམ་དམན་ལྷག་ལོག་པ་ཞེས་བྱ་བ་ནི་ལུས་ངག་ཡིད་དང་གསུམ་གྱི་སྒོ་ནས་ངེས་པ་ཡིན་ཏེ། དེ་ཡང་ལུས་ངག་ཡིད་གསུམ་གྱིས་བྱེད་འགྱུར་གྱི་ལས་ཀྱི་དབང་དུ་བྱས་ནས་ལུས་ངག་ཡིད་གསུམ་པོ་རང་རང་གི་ཡུལ་སོ་སོ་ལ་འཇུག་པ་ཆུང་ངམ། ལས་ལ་མི་སྦྱོར་བ་དང༌། སྦྱོར་ཡང་འཇུག་པ་དམན་པ་རྣམས་ནི་དེ་གསུམ་གྱི་ལས་དམན་པ་ཡིན་ཞིང༌། ཡང་ཡུལ་སོ་སོ་ལ་ཧ་ཅང་བརྟུན་ངས་ཞེས་པ་བསྟུད་དྲགས་ནས་ཆེར་འཇུག་པ་ནི་དེ་གསུམ་གྱི་ལས་ལྷག་པའི་སྦྱོར་བ་ཞེས་བྱ་སྟེ། དེ་བཞིན་དུ་བཤང་གཅི་ལ་སོགས་འབྱུང་ལ་ཉེ་བའི་ཚེ་ཤུགས་བཀག་པའམ་བྲོ་བ་མེད་ཀྱང་ནན་གྱིས་བཙིར་བ་དང༌། མི་ཐེག་བཞིན་དུ་ཁུར་བ་སོགས་ལུས་གཅུས་པར་གྱུར་པ་དང༌། གཞན་ཡང་ཚེ་འདི་དང་སྔ་མར་ལུས་ངག་ཡིད་གསུམ་གྱི་སྒོ་ནས་མི་དགེ་བཅུ་བགྱིས་པ་ལ་སོགས་པ་རྣམས་ནི་ལོག་པར་སྦྱོར་བ་ཞེས་བྱ་སྟེ། འདི་དག་ཐམས་ཅད་ཀྱང་ནད་སྐྱེ་ཞིང་མཆེད་པར་བྱེད་པས་ན་འབད་ནས་སྤང་བར་བྱ་བ་ཡིན་ལ། ཤུགས་བསྟན་ལ་དབང་དོན་དང་སྤྱོད་ལམ་དམན་ལྷག་ལོག་པ་བརྗོད་མ་ཐག་པ་དེ་རྣམས་དང་བྲལ་ནས་ཡུལ་སོ་སོ་ལ་སྙོམས་པར་འཇུག་པ་ནི་ནད་མེད་དུ་གནས་པའི་རྒྱུའི་གཙོ་བོ་ཡིན་པའི་ཕྱིར་རོ།།

ནད་གསོག་ལྡང་ཞི་གསུམ་གྱི་རྣམ་པར་གཞག་པ་ལ་རྒྱུ་དང་ངོ་བོ་དང་དུས་ཏེ་གསུམ་གྱི་སྒོ་ནས་ཤེས་པར་བྱའོ། །གསོག་ལྡང་ཞི་གསུམ་གྱི་རྒྱུའི་གཙོ་བོ་ནི་སྨན་འགའ་ཞིག་དང་ཁ་ཟས་རྩུབ་པ་དང་སོགས་ཁོང་ནས་ཡང་བ་དང་ཕྲ་བ་དང་སྲ་བ་དང་གཡོ་བ་དང་སྐྱ་བའི་ཡོན་ཏན་ཅན་གལ་ཏེ་དྲོ་བ་དང་ལྡན་པར་བརྟེན་པའི་ཚེ་ན་རྒྱུ་དེས་རླུང་ཁོང་དུ་གསོག་པར་བྱེད་ལ། དེ་ཡང་རྩུབ་པ་ལ་སོགས་པའི་ཡོན་ཏན་དེ་རྣམས་རླུང་གི་མཚན་ཉིད་དང་ཆོས་མཐུན་ཞིང་སྟོབས་ཆེ་བས་རླུང་རང་གི་གནས་སུ་འཕེལ་ཞིང་གསོག་པར་བྱེད་པ་སྟེ། དྲོ་བ་དང་ལྡན་པ་དེས་རླུང་གསོག་པ་ལ་གེགས་བྱེད་མ་ནུས་ཀྱང་མགོ་མནན་པས་ལྡང་བར་མི་ནུས་པའོ། །དེ་ལྟར་བསགས་པའི་རླུང་དེ་ཡང་རྩུབ་པ་ལ་སོགས་པའི་ཡོན་ཏན་གྲང་བ་དང་ལྡན་པར་ཟོས་པས་ནི་རླུང་ནད་མངོན་སུམ་དུ་ལྡང་བར་བྱེད་ཅིང༌། རྩུབ་པ་སོགས་རླུང་གི་མཚན་ཉིད་དང་ཆོས་མཐུན་པ་ཙམ་དུ་མ་ཟད་ཁྱད་པར་གྲང་བས་ལྷན་ཅིག་བྱེད་པའི་རྐྱེན་བྱས་ཤིང༌། མགོ་གནོན་པའི་གཉེན་པོ་གཞན་མེད་པས་སོ། རྒྱུ་དེས་བསླང་བའི་རླུང་ནད་དེ་ཡང་ནམ་ཞིག་གི་ཚེ་སྣུམ་པ་དང༌། དྲོ་བ་དང་ཤུགས་ལས་ལྕི་བ་དང་སྦོམ་པ་དང་འཇམ་པ་དང་བརྟན་པའི་ཡོན་ཏན་དང་ལྡན་པའི་ཟས་སྨན་བསྟེན་པས་ནི་ཞི་བར་འགྱུར་བ་ཡིན་ནོ། དེ་བཞིན་དུ་རྣོ་བ་དང་སོགས་པའི་སྒྲས་སྣུམ་པ་དང་ཡང་བ་དང་དྲི་མནམ་པ་དང་འཁྲུ་ཞིང་གཤེར་བའི་ཡོན་ཏན་དང་ལྡན་པའི་ཟས་སྨན་བསིལ་བ་དང་ལྡན་པར་བསྟེན་ན་རྣོ་སོགས་ཀྱི་ནུས་པས་མཁྲིས་པ་རང་གནས་སུ་གསོག་ཅིང་བསིལ་བས་མགོ་མནན་ནས་མི་ལྡང་ལ། མཁྲིས་པ་ཁོང་དུ་བསགས་པ་དེའི་ངང་ལ་རྣོ་སོགས་དང་ལྡན་པའི་སྨན་ཚ་བ་དང་ལྡན་པར་བསྟེན་པས་མཁྲིས་པ་མངོན་སུམ་དུ་ལྡང་བར་འགྱུར་ཞིང༌། དེ་ཡང་རྟུལ་བ་དང་སོགས་པའི་སྒྲས་སྐྱ་བ་དང་ལྕི་བ་དང་རྩུབ་པ་དང་བརྟན་པ་དང་སྐམ་པའི་ཡོན་ཏན་དང་ལྡན་པའི་ཟས་སྨན་བསིལ་བ་དང་ལྡན་པར་བསྟེན་པས་ཞི་བར་འགྱུར་པའི་ཚུལ་སྔ་མ་ལྟར་རོ། །དེ་བཞིན་དུ་ལྕི་བ་དང་སྣུམ་པ་དང༌། དེའི་ཤུགས་བསྟན་རྟུལ་བ་དང་འཇམ་པ་དང་བརྟན་པ་དང་འབྱར་བག་གི་ཡོན་ཏན་དང་ལྡན་པའི་ཟས་སྨན་བསིལ་བ་དང་ལྡན་པར་བསྟེན་ན་ལྕི་སོགས་ཀྱི་ནུས་པས་བད་ཀན་རང་གི་གནས་སུ་གསོག་པར་འགྱུར་གྱི་བསིལ་བའི་གོང་བུ་གཅིག་ཏུ་བསྒོངས་ཤིང་འཁྱགས་པར་བྱས་པས་ལྡང་བ་མ་ཡིན་གྱི། དེ་ལྟ་བུའི་ངང་ལ་ལྕི་སོགས་ཀྱི་ཟས་སྨན་དྲོ་བ་དང་ལྡན་པར་བསྟེན་པས་བད་ཀན་གྱི་ནད་མངོན་སུམ་དུ་ལྡང་ཞིང་ལངས་པའི་བད་ཀན་དེ་ཡང་རྩུབ་པ་དང་སོགས་ཁོངས་ནས་ཡང་བ་དང་སྐྱ་བ་དང་རྣོ་བ་དང་གཡོ་བའི་ཡོན་ཏན་དང་ལྡན་པའི་ཟས་བད་ཀན་གྱི་མཚན་ཉིད་དང༌། ཚུལ་མི་མཐུན་པ་བསྟེན་པ་ཉིད་ཀྱིས་ཞི་བར་འགྱུར་བའི་རྣམ་པར་གཞག་པ་སྔ་མ་ལྟར་རོ། །གསོག་ལྡང་ཞི་གསུམ་གྱི་ངོ་བོ་ནི་རྩ་རྒྱུད་དུ། བད་ཀན་ཀླད་པ་ལ་བརྟེན་སྟོད་ན་གནས། །ཞེས་སོགས་དང༌། འོག་ནས། དེ་ཡང་རླུང་ནི་རུས་པ་ལ་གནས་ཏེ། །ཞེས་སོགས་འབྱུང་བའི་རླུང་མཁྲིས་བད་ཀན་རང་རང་གི་གནས་སུ་བཤད་ཟིན་དང་འཆད་འགྱུར་གྱི་དོན་ཟས་སྤྱོད་དང་ཡུལ་དུས་ལ་སོགས་པའི་དབང་གིས་རིམ་པས་སྟོབས་འཕེལ་ཞིང༌། ཇི་ལྟར་འཕེལ་བའི་རིམ་པས་རང་གནས་རྣམས་སུ་གསོག་པར་བྱེད་པ་ཡིན་ལ། བསགས་པ་དེ་ཡང་སྟོབས་སུ་གྱུར་པའི་རྒྱུ་ལས་ནི་ཅུང་ཟད་འཁྲུག་ཅིང་གཡོ་བར་བྱེད་པས་ན་དེ་དང་མི་མཐུན་པའི་ཡོན་ཏན་སྣུམ་པ་ལ་སོགས་པ་འདོད་པས་དོན་དུ་གཉེར་བར་བྱེད་དོ། །དེ་ཡང་རང་གནས་སུ་རླུང་བསགས་པ་སྟོབས་སུ་གྱུར་པ་དེའི་ཚེ་རླུང་གི་མཚན་ཉིད་དང་ཆོས་མི་མཐུན་པའི་ཡོན་ཏན་སྣུམ་པ་སོགས་འདོད་ཅིང༌། །མཁྲིས་པ་དང་བད་ཀན་དེ་ལྟར་གྱུར་པའི་ཚེ་རང་རང་གི་མཚན་ཉིད་དང་ཆོས་མི་མཐུན་པའི་ཡོན་ཏན་བསིལ་བ་ལ་སོགས་པ་དང་རྩུབ་པ་ལ་སོགས་པ་ཡིད་ལ་འདོད་པར་འགྱུར་བ་ཡིན་ནོ། །དེ་ནི་གསོག་པའི་ངོ་བོ་ཡིན་ལ། ལྡང་བའི་ངོ་བོ་ནི་རང་རང་གི་གནས་སུ་བསགས་པ་དེ་ཉིད་ཡུལ་དུས་དང་ཟས་སྤྱོད་ཀྱི་དབང་གིས་ལྡང་བ་དེའི་ཚེ་རང་རང་གི་གནས་ལས་ལོག་པའི་ལམ་གཞན་གཉིས་པོའི་གནས་སུ་ཞུགས་ནས་ན་བར་འགྱུར་ཏེ་རྩ་ཆུ་ཕྱི་ཡུལ་དུ་ནད་རང་རྟགས་རྣམས་གསལ་བར་སྟོན་པའོ། །ནད་ལྡང་བ་དེ་ལ་ཟས་སྤྱོད་སྨན་དཔྱད་དང་ཡུལ་དུས་སོགས་ཀྱི་སྒོ་ནས་འཕེལ་ཟད་འཁྲུགས་པའི་ནད་རྣམས་ཞི་བར་བྱས་ནས་རང་རང་གི་གནས་སུ་ལྡང་ཚད་ཀྱི་རང་བཞིན་དང་མཉམ་པར་གནས་ནས་ནད་མངོན་འགྱུར་བ་མེད་པ་ནི་ཞི་བའི་ངོ་བོ་ཡིན་པར་འདོད་དོ། །གསོག་ལྡང་ཞི་གསུམ་གྱི་དུས་ནི་སོས་ཀ་དང་སོགས་པའི་སྒྲས་དབྱར་ག་དང་སྟོན་ཀ་གསུམ་ནི་རིམ་པ་བཞིན་དུ་རླུང་གི་གསོག་ལྡང་ཞི་གསུམ་གྱི་དུས་ཡིན་ཏེ། དེ་བཞིན་དུ་མཁྲིས་པའི་གསོག་ལྡང་ཞི་གསུམ་གྱི་དུས་ཀྱང་རིམ་པ་བཞིན་དུ་དབྱར་དང་སྟོན་དང་དགུན་གསུམ་ཡིན་ལ། བད་ཀན་གྱི་གསོག་ལྡང་ཞི་གསུམ་གྱི་དུས་ནི་དགུན་སྨད་དང་དཔྱིད་དང་སོས་ཀ་གསུམ་ཡིན་པར་བཤད་དོ།།

དཔྱིད་ཀ་འདས་ཤིང་ཆར་རླུང་མ་རྒྱས་གོང་གི་སོ་གའི་དུས་སུ་ཡང་ལ་རྩུབ་པའི་རླུང་གི་མཚན་ཉིད་དང་ཆོས་མཐུན་པའི་ཡུལ་དུ་སྡོད་པ་དང༌། རླུང་གི་རང་བཞིན་ཅན་གྱི་ལུས་དང་ལྡན་པའི་མིས་ཡང་ལ་རྩུབ་ཅིང་སྐྱ་གཡོའི་ཡོན་ཏན་དང་ལྡན་པའི་ཟས་དང༌། དེ་འདྲ་བའི་སྤྱོད་ལམ་ཀུན་ཀྱང་ལྷན་ཅིག་ཏུ་དུས་མཚུངས་པར་བསྟེན་པར་གྱུར་པས་རླུང་གསོག་པར་བྱེད་པ་ཡིན་གྱི། ཡུལ་ལ་སོགས་པས་ཀྱང་རྩུབ་ཅིང་ཡང་བས་ལྡང་བར་རིགས་ཀྱང༌། དུས་དེ་ཉིད་ཤིན་ཏུ་དྲོ་བ་ཡིན་པས་ན་དྲོ་བ་དེས་རྩུབ་པ་སོགས་དང༌། སྟོབས་མ་མཚུངས་པས་གསོག་པའི་གེགས་བྱེད་མ་ནུས་པར་ཅུང་ཟད་ནུས་པ་ཆུང་དུ་བཏང་བས་ལྡང་བར་མི་འགྱུར་བ་ཡིན་ལ། དུས་དེར་བསགས་པ་དེ་ཉིད་དབྱར་གའི་དུས་ཆར་རླུང་རྒྱས་པའི་ཚེ་གྲང་བ་སྐྱེས་པས་རྐྱེན་བྱས་ཏེ་ལྡང་ཞིང༌། དེ་ཡང་ཆར་རླུང་ཆད་ནས་དགུན་གྱི་གྲང་བ་མ་ཟིན་པའི་བར་གྱི་སྟོན་དུས་སུ་སྣུམ་ལ་དྲོ་བ་སོགས་རླུང་གི་མཚན་ཉིད་དང་ཆོས་མི་མཐུན་པ་ཆེར་རྒྱས་པའི་དབང་གིས་ཞི་བར་འགྱུར་བ་ཡིན་ནོ། །དཔེ་དེ་བཞིན་དུ་དབྱར་གའི་དུས་ཀྱི་ཚེ་རྣོ་ཚ་སྣུམ་པ་ལ་སོགས་པའི་ཡུལ་དུ་སྡོད་ཅིང༌། མཁྲིས་པའི་རང་བཞིན་ཅན་གྱི་མིས་རྣོ་ཚ་སྣུམ་སོགས་ཀྱི་ཟས་དང་སྤྱོད་ལམ་ཀུན་དུས་མཚུངས་པར་བསྟེན་པར་གྱུར་པས་མཁྲིས་པ་རང་གནས་སུ་འཕེལ་བ་ལ་ཆར་རླུང་གི་བསིལ་བས་མངོན་སུམ་དུ་ལྡང་བའི་གེགས་བྱས་ཏེ་སྟོབས་ཞན་དུ་བཏང་བས་མཁྲིས་པ་གསོག་པ་ཡིན་གྱི་ལྡང་བར་མི་འགྱུར་ལ། དེ་ཡང་སྣུམ་དྲོ་རྣོ་བ་སོགས་ཀྱི་ཡོན་ཏན་དང་ལྡན་པའི་དུས་སྟོན་ཀའི་ཚེ་མཁྲིས་པ་རང་གི་མཚན་ཉིད་དང་ཆོས་མཐུན་པའི་རྐྱེན་དེས་ལྡང་ཞིང་ལངས་པ་དེ་ཉིད་སྟོན་གྱི་སྣུམ་དྲོ་ཚ་རྣོའི་དུས་ལས་འདས་ཤིང་དཔྱིད་ཀའི་རྩུབ་ཡང་ལ་མ་ཟིན་པའི་བར་གྱི་དགུན་སྟོད་ཀྱི་དུས་དེར་བསིལ་བ་ལ་སོགས་པ་མཁྲིས་པའི་མཚན་ཉིད་དང་ཆོས་མི་མཐུན་པའི་ཡོན་ཏན་དང་ལྡན་པའི་དབང་གིས་ཞི་བར་འགྱུར་བ་ཡིན་ནོ། །དེ་བཞིན་དུ་དགུན་སྟོད་ཀྱི་ཟླ་བ་གཉིས་འདས་ཤིང་དཔྱིད་ཀའི་དུས་ལ་མ་སླེབས་པའི་དགུན་སྨད་ཀྱི་དུས་དེར་བསིལ་སྣུམ་ལྕི་རྟུལ་སོགས་དང་ལྡན་པའི་ཡུལ་དུ་སྡོད་ཅིང་བད་ཀན་གྱི་རང་བཞིན་ཅན་དང་ལྡན་པའི་མིས་བསིལ་སྣུམ་ལྕི་རྟུལ་སོགས་དང་ལྡན་པའི་ཟས་དང་སྤྱོད་ལམ་ཀུན་དུས་མཚུངས་པར་བསྟེན་པར་གྱུར་པས་བད་ཀན་རང་གནས་སུ་གསོག་པ་ཡིན་གྱི། དེའི་དུས་ལྷག་པར་གྲང་བས་ཆུ་འཁྱགས་རོམ་དུ་སོང་བའི་ཞུན་མར་འཁྱགས་ནས་གོང་བུར་འགྲིལ་བ་བཞིན་དུ་བད་ཀན་བསྒོངས་པས་དངོས་སུ་ལྡང་བ་མ་ཡིན་ལ། བསྒོངས་པ་དེ་དཔྱིད་ཀའི་དུས་ཀྱི་ཉི་མའི་འོད་ཤིན་ཏུ་དྲོ་བས་གོང་བུ་བཤིག་ནས་ནད་དུ་ལྡང་ཞིང༌། ལངས་པ་དེ་ཡང་སོ་ག་ཡང་ལ་རྩུབ་པ་སོགས་བད་ཀན་གྱི་མཚན་ཉིད་དང་ཆོས་མི་མཐུན་པའི་ཡོན་ཏན་གྱི་དབང་གིས་ཞི་བར་འགྱུར་བའི་ཚུལ་ཞིབ་ཏུ་རླུང་གི་སྐབས་ལྟར་སྤྱད་པར་བྱའོ། །དེ་རྣམས་ནི་དུས་ལ་མ་ལྟོས་པའི་གསོག་ལྡང་ཞི་གསུམ་ཡིན་ལ། འོན་ཀྱང་ཞེས་པའི་སྒྲས་ཚ་བ་དང་བསིལ་བ་ལ་སོགས་པ་འབྱུང་བ་ལྔའི་ཡོན་ཏན་དང་ལྡན་པའི་དཔྱིད་ཀ་སོགས་ཀྱི་དུས་ཁོ་ན་ལ་མ་བབས་ཀྱང་ཟས་དང་སྤྱོད་ལམ་དང་ཤུགས་ལས་སྨན་འགའ་ཞིག་གི་དབང་གིས་འཕྲལ་དུ་གསོག་ལྡང་ཞི་གསུམ་བྱེད་པའང་ཡོད་དེ། དཔེར་ན་རླུང་ཤས་ཅན་འགའ་ཞིག་གིས་སྐྱབས་དང་ཁུར་ཚོད་ཇ་ལ་སོགས་པ་ཟོས་ཤིང་འཐུངས་པས་རླུང་ཆེར་གསོག་ཅིང༌། དེ་མ་ཐག་ལྟ་བུར་ག་བུར་ལ་སོགས་པའི་དྲི་ཙམ་གྱིས་ཀྱང་ལྡང་ནུས་ལ། དེའི་ཚེ་ཤ་ཚོད་དང་ཆང་ལ་སོགས་པ་བསྟེན་ན་འཕྲལ་དུ་ཞི་བར་འགྱུར་བ་ལྟ་བུ་སྟེ་མཁྲིས་པ་དང་བད་ཀན་ལ་ཡང་སྦྱར་བར་བྱའོ། །བཤད་ཟིན་པ་དེ་རྣམས་ཀྱི་སློང་རྐྱེན་སྤྱིའི་རྣམ་པར་གཞག་པ་བསྟན་ནས།

ད་ནི་ཁྱད་པར་གྱི་སློང་རྐྱེན་བཤད་པར་བྱ་བ་ལ་ཡང་ཐུན་མོང་བ་དང་ཁྱད་པར་གྱི་སློང་རྐྱེན་ཏེ་རྣམ་པ་གཉིས་ཀྱི་སྒོ་ནས་ངེས་པར་བྱ་དགོས་སོ། །རླུང་ལ་སོགས་པའི་ནད་ཀུན་སློང་བར་བྱེད་པའི་ཐུན་མོང་གི་རྐྱེན་ནི་སོ་ག་སོགས་འབྱུང་བའི་དུས་དང༌། འབྱུང་པོ་སོགས་ཀྱིས་གདོན་དང༌། གྱུར་པ་ལ་སོགས་པའི་དུག་དང༌། མི་འཕྲོད་པའི་ཟས་སྤྱོད་དང༌། སྨན་པས་གསོ་བ་ལོག་པར་བྱས་པ་དང༌། ཚེ་སྔ་མའི་ལས་ངན་པ་སད་པ་རྣམས་ལས་ནད་ཀྱི་རྣམ་པ་མི་འདྲ་བ་དཔག་ཏུ་མེད་པ་འབྱུང་བར་འགྱུར་བ་ཡིན་ནོ།།

རླུང་གི་ནད་སློང་བའི་རྐྱེན་ཁྱད་པར་བ་ནི། སྨན་དང་བཟའ་བཏུང་གི་རིགས་རོ་ཁ་བ་དང༌། ཨ་རུ་བ་རུ་ལས་གཞན་པའི་རོ་བསྐ་བའི་རིགས་དང༌། རོ་ཇི་ལྟར་གྱུར་ཀྱང་ཡོན་ཏན་ཡང་ཞིང་རྩུབ་པ་དང༌། ཤུགས་ལས་སྲ་ཕྲ་སྐྱ་གཡོ་གྲང་བ་དང་ལྡན་པ་བསྟེན་དྲགས་པ་དང༌། བུད་མེད་ལ་ཆགས་པ་མང་དུ་སྤྱད་པས་དུབ་པ་དང༌། ལན་མང་པོའི་བར་དུ་ལྟོ་ཆག་པ་དང༌། ཟས་ཀྱང་ཉུང་ཟད་ཁོ་ན་ལས་མ་ཟོས་པ་དང༌། ནུབ་མང་པོར་གཉིད་ཆག་པ་དང༌། སྔ་དྲོ་ལྟོ་སྟོང་ལ་ལུས་ངག་གི་བྱ་བ་དྲག་ཤུལ་ཆེས་པ་དང༌། གཏར་བ་དང་རྨས་པ་ལ་སོགས་པའམ་བུ་ག་རྣམས་ལས་ཁྲག་མང་དུ་ཟགས་པ་དང༌། ཡང་ན་འཁྲུ་སྐྱུག་དྲག་པོས་བཏབ་པའམ། ག་བུར་ལ་སོགས་པའི་དྲི་དང་ལྡན་ནམ་མེད་ཀྱང་རུང་སྟེ་བསེར་བུས་ཡུན་རིང་དུ་བུས་པ་དང༌། ག་ཆད་པ་སྟེ་ཡི་ཆད་ཆད་ཀྱི་བར་དུ་ངུས་པ་དང་རང་དང་གཞན་གྱི་སྒོ་ནས་མྱ་ངན་དང་སེམས་ཀྱི་ལས་ཆེས་ཆེར་བྱེད་པ་དང༌། ཉིན་མཚན་ཐོག་ཐག་ཏུ་སྨྲ་བ་སོགས་ཁའི་ལས་ཆེས་པ་དང༌། འབྲས་བུ་ལ་སོགས་པ་མ་སྨིན་པའམ་ཐལ་ཆེས་པ་ལྟ་བུ་བཅུད་མེད་པའི་ཁ་ཟས་ཁོ་ན་ཡེན་ལ་གཏད་པ་སྟེ་རྒྱུན་བསྲིང་བ་དང༌། བཤང་གཅི་ལ་སོགས་པ་འབྱུང་བའི་ཤུགས་བཀག་པ་དང༌། མི་འབྱུང་བཞིན་དུ་ནན་གྱིས་བཙིར་བ་ལ་སོགས་པའི་རྐྱེན་དེ་རྣམས་ཀྱིས་ནི་རླུང་གི་ནད་གློ་བུར་ལྡང་བར་བྱེད་པ་ཡིན་ནོ།།

མཁྲིས་པའི་ནད་སློང་བའི་རྐྱེན་ཁྱད་པར་བ་ནི་ཙི་ཏྲ་ཀ་དང་ན་ལེ་ཤམ་ལ་སོགས་པ་ཚ་བའི་རོ་དང་ལྡན་པ་ཕལ་ཆེར་དང༌། ཆང་གར་དང་ལོ་མར་འབྲུ་མར་སོགས་རྣོ་ཚ་སྣུམ་ལ་ཡང་ཞིང་དྲི་མནམ་པ་སོགས་ཀྱི་ཡོན་ཏན་དང་ལྡན་པའི་བཟའ་བཏུང་བསྟེན་དྲགས་པ་དང༌། རང་གི་རྒྱུད་ལ་ཞེ་སྡང་དྲག་པོ་སྐྱེས་པ་དང༌། ཚ་བའི་དུས་ཀྱི་ཉིན་གུང་ལ་གཉིད་ལོག་ཅིང་གཞི་གཅིག་ཏུ་འདུག་བཞིན་པའི་རྗེས་གློ་བུར་དུ་དྲག་ཤུལ་གྱི་ལས་བྱས་པ་དང༌། མི་ཐེག་བཞིན་དུ་ཁུར་ཆེན་པོ་འབད་པས་ཁུར་བ་དང༌། ས་ཤིན་ཏུ་སྲ་བའི་རང་བཞིན་ཤུགས་བསྐྱེད་ནས་བརྐོས་པ་དང༌། གཞུ་སྲན་མོ་བཀང་བ་དང༌། འཛིང་ཁ་དྲག་ཏུ་བཀྱེ་བ་དང༌། བང་རྒྱུག་པ་དང༌། ཚད་གུང་ལྟ་བུ་ལ་འགྲོ་ཞིང་ལས་མང་དུ་བྱེད་པ་དག་གིས་ཉེན་པར་གྱུར་པ་དང༌། རྟ་ཡིས་བརྡབས་པ་དང༌། གཡང་ལ་ལྷུང་བ་དང༌། འཐིབས་འོག་ཏུ་ཚུད་པ་དང༌། རྡོ་དང་དབྱུག་པ་ལ་སོགས་པས་ལན་མང་དུ་བརྡུངས་པ་དང༌། ཁྱད་པར་དུ་ཤ་མར་དང་བུ་རམ་ཆང་ལ་སོགས་པ་བཟའ་བཏུང་ཐལ་དྲགས་པ་སྟེ། དེ་ལྟར་བཤད་པའི་རྐྱེན་དེ་རྣམས་ཀྱིས་མཁྲིས་ཚད་གློ་བུར་དུ་སློང་བར་བྱེད་པ་ཡིན་ནོ།།

བད་ཀན་གྱི་ནད་སློང་བར་བྱེད་པའི་རྐྱེན་ནི། སྐྱབས་དང་ཁུར་མང་སོགས་རོ་ཁ་བ་དང༌། འོ་མ་སོགས་རོ་མངར་བ་དང༌། རོ་ཇི་ལྟར་གྱུར་ཀྱང་ལྕི་བསིལ་སྣུམ་རྟུལ་འཇམ་བརྟན་སོགས་ཀྱི་ཡོན་ཏན་དང་ལྡན་པའི་བཟའ་བཏུང་བསྟེན་དྲགས་པ་དང་ཟས་ཟོས་ནས་འགྲངས་པའི་དུས་རྗེས་སུ་དལ་བར་འདུག་པ་དང༌། ཉིན་གཉིད་ལོག་ཅིང་རླན་སྟེང་དུ་ཉལ་བའམ། ཡུན་རིང་དུ་སྡོད་པ་དང༌། སྟོན་ཀའི་དུས་མ་ཡིན་པ་ཁྱད་པར་དགུན་སྨད་ཆུར་ཞུགས་པ་དང༌། གྲང་བའི་དུས་སུ་གོས་སྲབ་མོ་ལ་བརྟེན་པ་དང༌། དེའི་དབང་གིས་འཁྱགས་པ་དང༌། གྲོ་དང་སྲན་མ་དང༌། ཤུགས་ལས་ཁམ་བུ་སོགས་གསར་ཐོག་རྣམས་སེར་ཅན་ཏེ་མ་སྨིན་པའམ། སྨིན་ཡང་རློན་པ་མང་དུ་ཟ་བ་དང༌། ཡང་ན་ཡུན་རིང་པོར་ལོན་པས་སུངས་པར་གྱུར་པ་དང༌། ར་ཤ་དང་སྐོམ་པོ་སྟེ་རྟོལ་དུ་གྲགས་པའི་དུད་འགྲོའི་ཤ་ཤིན་ཏུ་རིད་པ་དང༌། ཚིལ་བུ་དང་རྐང་རྣམས་མང་དུ་ཟ་བ་དང༌། འབྲུ་མར་དང་རྩི་མར་དང༌། གཞན་ཡང་བཟའ་བའི་བྱེ་བྲག་རུལ་པ་རྣམས་དང༌། ལོ་བཤུར་ཏེ་སྲན་མ་ལ་སོགས་པའི་ལོ་མ་རེངས་པའམ་རྙིད་པ་དང༌། ལ་ཕུག་རས་པ་དང༌། རི་སྒོག་ལ་སོགས་ཏེ་རྗེན་ཟས་ཀྱི་རིགས་མཐའ་དག་ཟ་བ་དང༌། དེ་རྣམས་རྗེན་པ་མ་ཡིན་པར་བཙོས་ཀྱང་རུང་སྟེ། མ་ཚོས་པའམ་ཡང་ན་ཚིག་དྲགས་པ་དང༌། སྙོམས་པར་ཚོས་ཀྱང་རུང༌། ཡུན་ལོན་པས་ཁེངས་པོར་གྱུར་པའི་ཟས་རྣམས་ཟ་བ་དང༌། ར་ཡི་འོ་རློན་ཏེ་དྲོན་མོ་མ་ཡིན་པ་དང༌། ཞོ་མ་ལངས་པ་དང༌། དར་བ་རས་པ་དང༌། ཆུ་གྲང་དང༌། ཇ་ལ་སོགས་པ་མང་དུ་འཐུངས་པ་དང༌། བཤད་མ་ཐག་པ་དེ་རྣམས་མ་ཡིན་པའི་བཟའ་བཏུང་ཡིན་ཡང་ཧ་ཅང་ཟ་ཆེས་ཏེ་འོག་ནས། ལྟོ་བའི་ཆ་གཉིས་ཟས་ལ་ཆ་གཅིག་སྐོམ། །ཞེས་སོགས་ཀྱི་ཚད་ལས་འདས་པའམ། སྔ་མའི་ཟས་མ་ཞུ་བཞིན་དུ་སླར་ཡང་ཕྱི་མ་གཅིག་ཟ་བ་སྟེ། མདོར་ན་དུས་མ་ཡིན་པར་ཟོས་པ་དེ་ལ་སོགས་པའི་རྐྱེན་དེ་རྣམས་ཀྱིས་བད་ཀན་ཞེས་བྱ་བ་གྲང་བའི་ནད་ཀྱི་རང་བཞིན་ཅན་དེ་ཉིད་སློང་བར་བྱེད་པ་ཡིན་ནོ། །མ་གསུངས་ཀྱང་དེ་ལྟར་བཤད་ཟིན་པའི་སློང་རྐྱེན་གྱི་ཟས་དང་སྤྱོད་ལམ་དེ་རྣམས་འབད་པས་ཐབས་ཀྱིས་སྤངས་ནས་དེའི་མི་མཐུན་ཕྱོགས་ཀྱི་ཡོན་ཏན་རྣམས་ལ་བསླབས་པས་ནད་ཀྱིས་ཉེ་བར་འཚེ་བར་མི་འགྱུར་ཞིང༌། དེའི་དབང་གིས་རང་རང་གི་ཚེའི་ཚད་ཇི་ཙམ་ཡོད་པ་དང་མཚུངས་པར་གནས་པར་བྱེད་དོ། །དུས་མ་ཡིན་པར་འཆི་བའི་འཇིགས་པ་མི་འབྱུང་ངོ༌།།

བཤད་ཟིན་པའི་རླུང་མཁྲིས་བད་ཀན་རྐྱང་པའི་སློང་རྐྱེན་དེ་དག་རྣམས་ཕན་ཚུན་འདྲེས་པ་ལས་ལྡན་པ་དང་འདུས་པའི་ནད་བསྐྱེད་པར་འགྱུར་ཏེ། དེ་ཡང་རླུང་མཁྲིས་གཉིས་ཀྱི་སློང་རྐྱེན་རྣམས་འདྲེས་པར་བསྟེན་ན་རླུང་མཁྲིས་ལྡན་པའི་ནད་དང༌། བད་རླུང་གཉིས་ཀྱི་སློང་རྐྱེན་རྣམས་འདྲེས་པར་བསྟེན་ན་བད་རླུང་ལྡན་པའི་ནད་དང༌། བད་མཁྲིས་གཉིས་ཀྱི་སློང་རྐྱེན་རྣམས་འདྲེས་པར་བསྟེན་ན་བད་མཁྲིས་ལྡན་པའི་ནད་དང༌། དེ་གསུམ་གའི་སློང་རྐྱེན་རྣམས་འདྲེས་པར་བསྟེན་ན་གསུམ་ཀ་འདུས་པའི་ནད་དུ་འགྱུར་བ་ཡིན་ནོ་ཞེས་གསུངས་སོ། །འདིའི་ཚུལ་རྒྱས་པར་གཞན་མང་པོ་ཞིག་ནས་བཤད་མོད་དུ་ཟིན་ཀྱང་གོ་བའི་ཤུགས་ལས་རྟོགས་སླ་བ་དང་མང་བའི་འཇིགས་པས་མ་སྤྲོས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་ནད་ཀྱི་རྐྱེན་བསྟན་པའི་ལེའུ་སྟེ་དགུ་པའོ།། །།

མཐའ་མའི་འདོན་ཐེངས་།: 05.09.2023 ཉིན། 10:00 AM