ལེའུ་ཉེར་བརྒྱད་པ། མགོ་ནད་གསོ་བ།

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །ལུས་སྟོད་གསོ་བའི་སྐབས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང་། །སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ལུས་སྟོད་དབང་པོའི་གསོ་ཐབས་མགོ་དང་མིག །རྣ་བ་སྣ་དང་ཁ་དང་ལྦ་བ་དྲུག །དང་པོ་མགོ་ཡི་ནད་ལ་རྒྱུ་རྐྱེན་དང༌། །དབྱེ་བ་རྟགས་དང་བཅོས་ཐབས་རྣམ་བཞིར་བསྟན།།

རྒྱུ་རྐྱེན་དུད་པ་ཉིན་མཚན་གཉིད་ཆག་དང༌། །ཆང་མང་མང་སྨྲས་ངུ་བ་དྲགས་པ་དང་། །རླུང་འཚུབ་མ་གོམས་དྲིས་ཕོག་རྒྱུ་ལས་འབྱུང༌།།

དབྱེ་བ་གཙོ་བོའི་ནད་བརྒྱད་ཕལ་པ་དྲུག །དང་པོ་རླུང་མཁྲིས་ཁྲག་དང་བད་ཀན་དང༌། །ལྡན་པའི་ནད་གསུམ་མགོ་ཡི་སྲིན་དང་བརྒྱད། །ཕལ་པ་མ་རླུང་རྨེན་འབྲས་གློག་པ་ཅན། །སྐྲ་བྱི་སྤྱི་ཐེར་སྐྲ་དཀར་རྣམ་པ་དྲུག།

དེ་རྟགས་རླུང་གྱུར་མུར་འགྲམ་ཟུག་ཅིང་གཟེར། །དཔྲལ་བ་སྨིན་མཚམས་ལུག་པ་སྙམ་དུ་སེམས། །རྣ་བ་འུར་ཞིང་སོ་དང་འགྲམ་པ་ན། །རྩ་འཁྱུག་ལྟ་བ་མི་བཟོད་སྣ་ཆུ་མང༌། །ལྡང་དུབ་ན་ཞིང་སྣུམ་དུགས་བསྡམས་ན་བདེ། །མཁྲིས་གྱུར་རིམས་འདྲ་མགོ་ལུས་མིག་རྣམས་ཚ། །དུ་བས་བདུགས་སམ་མཚན་དུས་གྲང་ན་བདེ། །ཁྲག་གྱུར་རྩེ་ཆུང་རྒྱངས་ལ་མུར་འགྲམ་གཟེར། །ཆང་དང་དྲག་ཤུལ་གཉིད་དང་ཉི་ཚན་གནོད། །བད་ཀན་ལས་གྱུར་མགོ་ལྕི་ཟས་མི་ཞིམ། །སྐྱུག་ཅིང་མིག་སྐྲངས་མཚན་མོའི་དུས་ན་བདེ། །བད་མཁྲིས་མགོ་ནད་མེ་ཉིས་དྲོས་ཚེ་ན། །མགོ་ལྕི་དང་ག་མི་བདེ་ཆང་ནད་ཆེ། །བད་རླུང་ལྕི་འཁྱོམ་ཟི་ལ་ཟས་མི་ཞིམ། །རླུང་མཁྲིས་གཉིས་ལྡན་དཔྲལ་མིག་མུར་འགྲམ་ན། །གྲང་དྲོ་ངེས་མེད་ཕྱེད་གོང་བཀྲེས་དུས་ལྡང༌། །རྩ་རྣམས་འཕར་ཞིང་བསིལ་ཕེབས་དགོང་དུས་བདེ། །མགོ་སྲིན་སེམས་འཁྲུལ་སྟོབས་ཆུང་མི་བཟོད་ན། །སྣབས་ཀྱི་མདོག་དམར་རྒྱ་སྲུབས་སྟེང་དུ་སྐྲངས། །ངེས་མེད་ནད་ལྡང་ཟས་སྤྱོད་ཕན་གནོད་ཆུང༌། །གང་ལངས་རྩ་འཕར་སྒྲ་སྐད་དྲག་ཤུལ་ལྡང༌། །དཀར་ནག་འཁར་གོང་བསྲེགས་ལ་མཆིལ་མས་བརྟག །མ་རླུང་བུ་ལ་ཤོར་བ་མགོ་བོ་སྐྲངས། །དེ་བཞིན་རྨེན་འབྲས་སྲ་བར་སྐྲངས་པ་དང་། །སྲིན་ནད་འབྲུམ་ཕྲན་གློག་པས་ཁྱབ་པ་དང༌། །བད་ཀན་ཁྲག་མཁྲིས་ཆུ་སེར་སྐྲ་རྩ་སྲུལ། །ཀོ་ལེར་སྐྲ་བྱི་སྤྱི་བོ་ཐེར་པོ་དང༌། །ལུས་དྲོད་མགོར་ཞུགས་སྐྲ་ཚོས་སྐྲ་དཀར་འབྱུང༌།།

བཅོས་ཐབས་རླུང་ལས་གྱུར་པའི་མགོ་ནད་ལ། །ཞུན་མར་རྗེས་ལ་འོ་མ་དྲོན་མོ་བླུད། །ཤ་སྣ་མང་བརྡུངས་འུ་སུས་བྲན་བཙོས་བདུག །མར་སྣ་ཚོགས་དང་ཀ་ར་སྦྱར་ལ་བྱིན། །རླུང་འཇོམས་སྨན་དང་ཞུན་མར་སྦྱར་བའམ། །རས་བལ་ས་བོན་ཤིང་ཚ་ཛཱ་ཏི་དང༌། །གླ་སྒང་ཆུ་དྲོན་ལ་བཏབ་སྣ་སྨན་བཏང༌། །རྒྱ་སྲུབས་རྣམས་སུ་ཧོར་གྱི་མེ་བཙའ་བྱ། །སྡུད་སྒོ་གསུམ་དང་འཕར་རྩ་གང་ལངས་བསྲེག །མཁྲིས་གྱུར་མར་གསར་སྣུམ་འཆོས་རྗེས་ལ་གཏར། །བསིལ་བའི་སྐྱུག་འཁྲུས་སྦྱང་ཞིང་ཆུ་ཡིས་བྲན། །ཙན་དན་ཨུཏྤལ་རྒྱ་སྤོས་རུ་རྟ་བྱུག །ཀ་ར་གུར་ཀུམ་མར་གསར་སྣ་སྨན་བཏང༌། །ཁྲག་གྱུར་འབྲས་བུ་གསུམ་གྱི་ཐང་བཏང་ལ། །གཏར་དང་ཞལ་ཞལ་བྱ་ཞིང་ཆུ་ལྕག་བརྡེག །བད་གྱུར་མར་རྙིང་སྣུམ་རྗེས་སྐྱུག་ཏུ་གཞུག །ཚ་བ་ལྔ་དང་སྤྱང་ཚེར་བ་ཡིས་བདུག །ཙི་ཏྲ་ཀ་དང་སྒ་སྐྱ་སྲན་ཕྱེ་བྱུག །སྨྱུང་བྱས་ལ་ཕུག་སྦྲང་རྩིའི་སྣ་སྨན་བཏང༌། །བད་མཁྲིས་མགོ་ནད་ཆུ་ལྕག་མཚོགས་གསང་དབྱེ། །ལོ་གྲངས་ཆུས་བྲན་བུལ་ཏོག་བཏབ་ལ་མཉེ། །སྐམས་ནས་ཞུན་མར་བྱུག་ཅིང་སེ་འབྲུ་སྦྱར། །བད་རླུང་མགོ་ནད་གཉིས་ཀ་ལྡན་པར་བཅོས། །རླུང་མཁྲིས་མགོ་ནད་རླུང་གྱུར་ལྟ་བུར་གསོ། །དེ་རྗེས་ཁྱད་པར་གཏར་ག་མང་དུ་གདབ། །སྲིན་ལ་གཏར་ཁྲག་དྲོན་མོ་སྣར་བླུག་ལ། །ཉ་རུས་ཤིང་ཀུན་བྱི་ཏང་ག་དང་གསུམ། །བ་ཆུ་སྦྱར་བའི་སྣ་སྨན་བཏང་འབྱུང་འགྱུར། །མར་དང་སྦྱར་བའི་དུ་བ་སྣ་རུ་བདུག །གླ་རྩི་བཙན་དུག་ཤིང་ཀུན་མ་རུ་རྩེ། །ལང་ཐང་ཙེ་དང་རྩད་བཙོད་ཕུར་མོ་རྣམས། །ཤ་ཚིལ་སྦྱར་ལ་བསྲེགས་པའི་དུ་བས་བདུག །མ་རླུང་རླུང་བཅོས་བྱས་རྗེས་འབྲས་ལྟར་གསོ། །རྨེན་འབྲས་ནད་ལ་དེ་ཡི་གསོ་བ་སྦྱར། །གློག་པ་ཅན་ལ་ལྕགས་ཀྱི་ཞལ་ཞལ་གདབ། །བ་གཅིན་ཁྱིམ་བྱའི་བྲུན་དང་འབའ་ཆ་བསྐུ། །ཡང་ན་རྟ་སྦངས་ཁུ་བ་ཚ་བཏབ་བྱུག །སྤྱི་ཐེར་ཀོ་ལེར་སྐྲ་འབྱི་སྦྱངས་བྱས་ལ། །ཐུར་མས་བཙགས་ཏེ་ཕག་པའི་རྐང་མར་ཚིལ། །སོ་མ་ར་ཛ་སྐྱུ་རུ་ར་སྦྱར་བྱུག །སྤང་མ་ལྡོང་རོས་ནལ་ཤམ་ནག་མཚུར་བྱུག །ཡང་ན་སྤང་མ་རུ་རྟ་ཐལ་ཏྲེས་ཏིལ། །ཨུཏྤལ་འོ་མ་སྦྲང་སྦྱར་ལྡེ་གུ་བྱུག །ཡང་ན་པད་མ་གེ་སར་སྐྱུ་རུ་ར། །ཤིང་མངར་ཏིལ་ནག་སྦྲང་དང་སྦྱར་ལ་བྱུག །རྩ་བ་ལྔ་དང་ཏིལ་མར་སྣ་སྨན་བླུག །སྐྲ་དཀར་ལུག་རུའི་ཐལ་བ་ཡུངས་ཀར་བྱུག །ཤིང་མངར་སྟག་ཚེར་ཙན་དན་པི་པི་ལིང༌། །ཨུཏྤལ་སྐྱུ་རུའི་ཁུ་བ་མར་བསྐོལ་བའི། །སྣ་སྨན་མགོ་བསྐུས་སྐྲ་དཀར་ཀླད་ནད་སེལ། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མགོ་ནད་གསོ་བའི་ལེའུ་སྟེ་ཉི་ཤུ་རྩ་བརྒྱད་པའོ།། །།

མཐའ་མའི་འདོན་ཐེངས་།: 20.12.2022 ཉིན། 4:03 PM