ལེའུ་ཉེར་དྲུག་པ། སྤང་བླང་མུ་བཞིར་བརྟག་པ། 

ངན་གཡོ་སྐྱོན་ཅན་ལྟ་བུའི་བརྟག་ཐབས་བཤད་ཟིན་མ་ཐག་པ་དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །དེའང་ཀྱེ་དྲང་སྲོང་ཆེན་པོ་ཉོན་ཅིག་དང་ངས་བཤད་པར་བྱའོ་ཞེས་གདམས་ནས་བརྟག་ཐབས་གསུམ་པ་སྤང་བླང་མུ་བཞིའི་སྒོ་ནས་བརྟག་པ་དེ་ལ་ནི་ནད་པ་གང་ཞིག་གསོ་སླ་བ་དང་གསོ་དཀའ་བ་དང་གསོ་བ་ཙམ་དང་སྤང་བར་བྱ་བ་སྟེ་རྣམ་པ་བཞིའི་སྒོ་ནས་འཆད་དོ།།

སྤང་བླང་མུ་བཞིའི་ནང་ནས་དང་པོ་གསོ་སླ་བ་དེ་ལ་ཡང་ཡན་ལག་དུ་མ་དང་ལྡན་པའི་སྒོ་ནས་གསོ་སླ་བ་དང༌། གང་ཟག་ནད་པའི་སྒོ་ནས་གསོ་སླ་བ་དང༌། དེ་ལ་གནས་པའི་ནད་ཀྱི་སྒོ་ནས་གསོ་སླ་བའོ། །ཡན་ལག་དུ་མ་དང་ལྡན་པའི་སྒོ་ནས་གསོ་བར་སླ་བ་དེ་ལ་ཡང་ནི་སྨན་པ་དང་སྨན་དང་ནད་གཡོག་གི་ཡན་ལག་སྟེ་རྣམ་པ་གསུམ་དང་ལྡན་པའོ། །སྨན་པ་གང་ཞིག་མཁས་པའི་སྟེགས་བུ་ལྟ་བུ་བློ་གྲོས་དང་སྦྱངས་པ་དང་སྙན་གྲགས་དང་ཀུན་གྱིས་བཀུར་བ། བཞི་ལ་འཛེགས་པས་རིག་པའི་གནས་ལྔ་སྤྱི་དང་ཁྱད་པར་དུ་གསོ་བ་རིག་པས་མངོན་པར་མཐོ་བ་དང༌། རྒྱུད་དང་བསྟན་བཅོས་དང་ལུང་དང་མན་ངག་བཞིའི་སྒོ་ནས་གཞུང་གི་དོན་མཐའ་དག་ཤེས་པ་དང༌། བརྟག་པ་དང་སྨན་དང་དཔྱད་དང་ཟས་སྤྱོད་བསླབ་པ་བཞིའི་ལས་རྣམས་མ་ལུས་པ་སློབ་དཔོན་གྱིས་ཉམས་སུ་ལེན་པ་མཐོང་བ་དེ་ཇི་ལྟ་བ་བཞིན་དུ་རང་གིས་གོམས་པ་དང༌། རིགས་ངན་ཞིང་འཚོལ་བ་དང་ནད་པའི་ནོར་ལ་བརྣབ་སེམས་ཀྱི་བློ་དང༌། ཕྱོགས་རིགས་ཅན་གྱི་སྙིང་རྗེ་དང༌། སྨན་དཔྱད་ལ་སླ་ཐབས་ཀྱི་ཆོ་ག་ཁྲག་འཁྲུགས་ཡིད་དུ་མི་འོང་བར་བྱེད་པའི་སྐྱོན་རྣམས་དང་བྲལ་བས་གཙང་བ་སྟེ། དེ་ལྟར་ན་སྨན་པའི་ཡན་ལག་བཅུ་དྲུག་པོ་འདི་དག་དང་ལྡན་ན་ནད་གང་ཡང་གསོ་སླ་བ་ཡིན་ཏེ། སྨན་པ་ནི་གསོ་བར་བྱེད་པའི་གཙོ་བོ་ཡིན་པས་སོ། །ནད་གང་དག་ལ་གཏོང་བར་འོས་པའི་སྨན་དེ་ལ་ནི་ཐང་ཕྱེ་ལ་སོགས་པའི་ཆོ་ག་མི་འདྲ་བ་མང་པོ་སྦྱར་དུ་རུང་བ་དང༌། ལྕི་སྣུམ་ལ་སོགས་ཡོན་ཏན་མང་དུ་ལྡན་པ་དང༌། སྐྱེ་སར་སྐྱེས་པ་སོགས་སྨན་གྱི་རང་བཞིན་ཕུན་སུམ་ཚོགས་ཤིང་རོ་ནུས་སོགས་ཁམས་དང་འཕྲོད་པར་སྦྱོར་བ་སྟེ། སྨན་ཉིད་ལའང་ཡན་ལག་བཅུ་དྲུག་དང་ལྡན་ན་གསོ་སླ་བའི་རྒྱུའོ། །ནད་པ་དང་འབྲེལ་བའི་ནད་གཡོག་དེ་ཡང་ནད་པའི་བཟའ་བཏུང་སོགས་དུས་ལས་མི་ཡོལ་བར་སྟེར་བ་ལ་སྒྲིན་ཞིང་བརྩོན་པ་དང༌། ནད་པ་སོགས་ཉམ་ཐག་པར་ལྷག་པར་བརྩེ་བ་དང༌། ཟས་སྤྱོད་སོགས་བྱ་བ་ཀུན་ལ་ལུས་ངག་ཡིད་གསུམ་གཙང་སྦྲ་ཆེ་བ་དང༌། སྨན་པས་གང་བསླབས་པ་ཀུན་ཤེས་པའི་བློ་གྲོས་ཆེན་པོ་དང་ལྡན་པ་སྟེ། དེ་ལྟར་སྨན་པ་དང༌། སྨན་དང་ནད་གཡོག་སྟེ་ཡན་ལག་རགས་པའི་དབང་དུ་བྱས་ན་བཅུ་གཉིས་དང༌། ཞིབ་ཏུ་བཞི་བཅུ་རྩ་བརྒྱད་དང་ལྡན་ན་གསོ་བར་སླ་བ་ཡིན་ནོ། །གང་ཟག་པ་དང་བཅས་པའི་ནད་པ་དེའང་བུད་མེད་ལས་བཟློག་པའི་སྐྱེས་བུ་ཡིན་པ་དང༌། རྒན་བྱིས་ལས་གཞན་པའི་ལང་ཚོ་གཞོན་ཞིང་དར་བ་དང༌། རང་བཞིན་བཟང་ཞིང་དུལ་བ་དང༌། ལོངས་སྤྱོད་དང་ནད་ཡུན་སོགས་ལ་ཞུམ་པ་མེད་པའི་སྙིང་སྟོབས་དང་ལྡན་ཞིང་དཔའ་བ་དང༌། ཞི་སྦྱང་དང་འཇམ་རྩུབ་སོགས་ཀྱི་སྨན་དཔྱད་ཀུན་བཟོད་པར་ནུས་པའི་ལུས་དང་ལྡན་པ་དང༌། ནོར་རྫས་ཕྱུག་ཅིང་གཏོང་ཕོད་ཆེ་བ་དང༌། སྨན་པ་སོགས་ཀྱིས་ཕན་པའི་གྲོས་ཇི་ལྟར་བསྒོ་བ་བཞིན་ཉན་ལ་གཅེས་པར་འཛིན་པ་དང༌། ནད་ཀྱི་རྒྱུ་རྐྱེན་ཞུགས་ཚུགས་སོགས་ཤེས་པར་ནུས་པ་དང༌། སྨན་པས་ཇི་ལྟར་དྲིས་པའི་ལན་དུ་ནད་རྟགས་སློང་རྐྱེན་སོགས་ཟློས་པ་སྟེ་སྨྲ་བ་ལ་མཁས་པའང་གསོ་སླ་བའི་ཡུལ་ཡིན་ནོ། །མདོར་ན་ཡན་ལག་བདུན་པ་ལས། གསོ་བྱ་ང་རྒྱལ་ཁྲོ་གཏུམ་མེད། །སྨན་པས་བསྒོ་བའི་བཀའ་ཉན་ཞིང༌། །དཀོན་ཅོག་གསུམ་ལ་སེམས་དད་པ། །རང་གི་སྤྱོད་ལམ་རྩ་བ་ཡིན། །ཞེས་བཤད་པ་ལྟར་ལྡན་ན་གསོ་སླའོ། །གང་ལ་ནད་ཀྱི་སྒོ་ནས་གསོ་བར་སླ་ཞེས་བྱ་བ་ནི། ནད་ཀྱི་རྒྱུའམ་ནད་གཞི་དང༌། ནད་དེ་སྔར་ཇི་ལྟར་ལྡང་བའི་ཚུལ་དང༌། མཚན་ཉིད་དམ་ནད་རྟགས་རྣམས་ཆུང་བ་དང་དྭངས་མ་ལ་སོགས་པའི་གནོད་བྱ་དང༌། ངད་ཅན་གྲང་བ་ལ་སོགས་པའི་ཡུལ་དང༌། དབྱར་ལ་སོགས་པའི་དུས་དང༌། རླུང་གི་མི་ལ་སོགས་པའི་རང་བཞིན་རྣམས་མི་མཚུངས་པ་སྟེ། དཔེར་ན་རུས་པའི་གནས་སུ་མཁྲིས་པ་བབས་པ་དང༌། ངད་ཅན་གྲང་བའི་ཡུལ་དུ་མཁྲིས་པ་སྐྱེས་པ་དང༌། དབྱར་དང་དགོང་ཐོ་རངས་མཁྲིས་པ་ལྡང་བ་དང༌། རླུང་གི་རང་བཞིན་ཅན་གྱི་མི་ལ་མཁྲིས་པའི་ནད་ཀྱིས་བཏབ་པ་ལྟ་བུ་ཐམས་ཅད་འཛོམ་པའམ་གཅིག་གཉིས་ཙམ་ཚོགས་ནའང་གསོ་སླ་བ་ཡིན་ལ། ནད་གང་དང་གང་གིས་བཏབ་པ་དེའི་སྟེང་དུ་བླ་གཉན་གྱི་ནད་གཞན་གྱི་གནོད་པ་མེད་པ་དང༌། ཕྱི་དང་ནང་དང་བར་ཏེ་ལམ་གསུམ་པོ་གང་ཡང་རུང་བ་གཅིག་ལས་སྐྱེས་པ་དང༌། ནད་གཞི་གསུམ་པོ་ཕན་ཚུན་ལྡན་འདུས་སུ་མ་གྱུར་པའི་རྐྱང་པ་དང༌། ནད་མ་རྙིངས་པའི་གསར་པ་སྟེ། དེ་དག་རྣམས་དང་ལྡན་པའི་ནད་རྣམས་གསོ་བར་སླ་བ་ཡིན་ནོ་ཞེས་སྤྱིར་བཏང་བའོ། །དམིགས་བསལ་ནི། འོན་ཀྱང་ཞེས་པའི་སྒྲས་སྔ་མ་དག་ཏུ་མ་ཟད་ནད་འགའ་ཞིག་ལ་ཡུལ་དུས་མཚུངས་ཤིང་གནོད་བྱ་མཉམ་པ་དང༌། རྙིང་པ་གསོ་སླ་བ་དག་ཀྱང་ཡོད་དེ་གང་ཞེ་ན། རིམས་ལྟ་བུ་ལ་ཡུལ་སྐམ་ས་ཚ་གདུང་ཆེ་སར་སྐྱེས་པ་དང༌། དུས་སྟོན་ཀ་དང་ཉིན་གུང་མཚན་གུང་ལྡང་བ་དག་གཅིག་ཏུ་ཚོགས་ཤིང་མཚུངས་པ་དང་ཆུ་འགགས་ཀྱི་ནད་ལ་གནོད་བྱ་བཤང་གཅི་གཉིས་མཉམ་པ་དང༌། ཁྲག་གི་སྐྲན་ཡུན་རིང་རྙིངས་པར་གྱུར་པ་ཉིད་གསོ་བར་སླ་ཞེས་བྱའོ།།

གང་ཞིག་གསོ་དཀའ་བའི་ནད་ཅེས་བྱ་བ་ནི་གོང་དུ་སྨོས་པའི་ཡན་ལག་དང་ནད་པ་དང་ནད་ཀྱི་སྒོ་ནས་གསོ་སླ་བའི་ཆ་ཤས་དེ་དག་གི་འགའ་ཞིག་ཡོད་ཀྱང་ཕལ་ཆེར་མེད་པའམ། ལ་ལ་འཛོམ་ཡང་ལ་ལ་མ་འཛོམ་པས་ན་གསོ་སླ་བ་དང་སླ་བ་མ་ཡིན་པ་ཕན་ཚུན་ཁྲག་འཁྲུགས་སུ་འདྲེས་པ་སྟེ། དཔེར་ན་ནད་པ་དང་ནད་ཀྱི་སྒོ་ནས་གསོ་སླ་བའི་མཚན་ཉིད་ཡོད་དུ་ཟིན་ཀྱང་སྨན་པའི་ཡན་ལག་མ་ཚང་བ་དང༌། སྨན་པ་མཁས་སུ་ཟིན་ཀྱང་ནད་པ་དང་ནད་ཀྱི་སྒོ་ནས་གསོ་སླ་བ་ལས་ལྡོག་པ་ལྟ་བུ་སོགས་དང་ལྡན་པས་སྨན་དཔྱད་རིམ་གྲོ་ལ་སོགས་པ་ཐབས་མང་པོའི་སྒོ་ནས་ཡུན་རིང་དུ་རང་གིས་གསོ་བ་དགོས་པ་དེ་ལྟ་བུ་ནི་གསོ་དཀའ་བ་ཞེས་བྱའོ།།

བཤད་མ་ཐག་པའི་གསོ་སླ་བ་དང་དཀའ་བ་དེ་ལས་གོ་ལྡོག་པར་གྱུར་ནས་གསོ་བར་མི་ནུས་པ་དེ་ལྟ་བུ་ལ་སྔར་ནས་མང་དུ་གོམས་པའི་ཁ་ཟས་དང་སྤྱོད་ལམ་ཙམ་གྱིས་ཕན་པར་བྱ་བ་ཉིད་ཡིན་ཏེ། ཅིའི་ཕྱིར་ཞེ་ན། དེ་ནི་ནད་དེ་ཉིད་ཀྱིས་གཏོང་བར་བྱེད་པ་མ་ཡིན་ཡང་ལས་ཀྱིས་འཕངས་པའི་ཚེའི་ལྷག་མ་ཙམ་ལུས་ནས་རེ་ཞིག་མི་འཆི་བ་ཡིན་སྲིད་པའི་ཕྱིར། འདི་ལྟ་བུ་ལ་ནི་གསོ་བ་ཙམ་ཞེས་བྱ་སྟེ་གསོ་བའི་ཚུལ་ལྟར་བྱེད་པའོ། །དེ་ནི་ལྷག་མ་ལུས་པ་དེ། རྣམ་འགྲེལ་ལས། གནས་གསུམ་པར་ནི་འཕོ་བས་ན། །བསྟན་བཅོས་ལེན་པ་རིགས་ལྡན་ཡིན། །ཞེས་དང༌། དབང་ཕྱུག་ཆེན་པོའི་གཡུལ་རྒྱལ་དང་འཇམ་དཔལ་དབྱངས་ཀྱི་གཙུག་ལག་ལས་ལུས་ཅན་སོ་སོའི་ཚེ་ཚད་ལྷག་སོགས་ཞིབ་པར་གསུངས་པ་ཁོ་བོའི་བསྟན་བཅོས་བཻ་ཌཱུར་དཀར་པོ་ལས་ཤེས་པར་བྱའོ།།

ནད་པ་གང་ཞིག་སྨན་པས་སྤང་བར་བྱ་བའང་ཡོད་པས་དེ་ལ་གསོ་བའི་ཐབས་ཡོད་ཀྱང་སྤང་བར་བྱ་བ་དང༌། གསོ་ཐབས་མེད་པས་སྤང་བར་བྱ་བ་ཞེས་རྣམ་པ་གཉིས་སོ། །ནད་པ་གང་ཞིག་ཆོས་ཀྱི་རྒྱལ་པོ་ལ་མི་གུས་པ་དང་དགེ་བའི་བཤེས་གཉེན་ཞེས་མཆོད་གནས་སྡེ་གཉིས་ལ་ལོག་ལྟ་བྱེད་པ་དང་འགྲོ་བ་སེམས་ཅན་རྣམས་ལ་སྡང་བ་དང་སྨན་པས་སྔར་ཕན་བཏགས་བསམ་པའི་སྒོ་ནས་བྱས་པ་མི་གཟོ་ཞིང༌། ལུས་ངག་གི་སྒོ་ནས་བརྙས་པར་བྱེད་པ་དང༌། ནད་འཆོས་པའི་ལོང་མེད་པར་བྲེལ་བ་དང༌། སྨན་དཔྱད་རིམ་གྲོ་སོགས་བྱེད་པའི་འབྱོར་པ་མི་ལྡན་པ་དང༌། སྨན་པ་ལ་སོགས་པས་ཕན་པའི་བསླབ་བྱ་ལ་ཉན་པར་མི་བཏུབ་པ་དང༌། ཚེ་ཟད་ཅིང་རྟག་ཏུ་མྱ་ངན་བྱུར་ཆགས་ཀྱིས་མནན་པ་དང་ཐུབ་པའི་བསྟན་པ་སྤྱི་དང་བྱེ་བྲག་ཀུན་མཁྱེན་ཙོང་ཁ་པ་ཆེན་པོ་དང་ཕྱག་ན་པདྨའི་ཆོས་སྲིད་ཟུང་འབྲེལ་རྣམས་བཤིག་པའི་ལས་ལ་འཇུག་པ་སོགས་ལ་ནི་སྐྱེ་བོ་གཞན་གྱི་ཡ་ག་སྟེ་བརྗོད་པ་ངན་པ་འབྱུང་བའི་ཕྱིར་དང༌། རྒྱལ་པོ་མི་དགྱེས་པའི་མིར་ཕན་བཏགས་ན་རང་ཉིད་ལའང་ཉེས་བྱས་ལ་སོགས་པ་འབྱུང་བ་དག་ཀྱང་ཡོད་པས་ན་དེ་རྣམས་ལ་སྨན་པས་གསོ་ཐབས་ཡོད་མོད་ཀྱང་ཐབས་མཁས་ཀྱིས་སྤང་བར་བཤད་པ་ཡིན་ནོ། །ནད་པ་གང་ཞིག་སྨན་པས་ཅི་བྱས་ཀྱང་གསོ་བའི་ཐབས་མེད་པས་སྤང་བར་བྱ་བ་ནི་ཤིན་ཏུ་ཕྱིན་ཅི་ལོག་ཏུ་གྱུར་པ་དང༌། འཇིག་ལྟས་ཀྱི་སྐབས་སུ་བཤད་པའི་ཉེ་བ་དང་ཤིན་ཏུ་ཉེ་བའི་འཆི་ལྟས་སྣང་བ་དང༌། རྩ་རྒྱུད་དུ། འཚོ་བ་གསུམ་ཟད་འདུ་བ་གཤེད་དུ་བབས། །ཞེས་སོགས་གསུངས་པའི་སྲོག་གཅོད་ཀྱི་ནད་དགུ་པོ་གང་ཡང་རུང་བས་ནད་པ་དེའི་ལུས་ལ་དམ་དུ་བཟུང་བ་རྣམས་སངས་རྒྱས་སྟོང་གི་ཐུགས་རྗེས་ཀྱང་འཚོ་བའི་ཐབས་སུ་འགྱུར་བ་མ་ཡིན་པས་སྤང་བར་བྱའོ་ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་སྤང་བླང་མུ་བཞིར་ཕྱེ་ནས་བརྟག་པའི་ལེའུ་སྟེ་ཉི་ཤུ་རྩ་དྲུག་པའོ།། །།

མཐའ་མའི་འདོན་ཐེངས་།: 05.09.2023 ཉིན། 11:25 AM