ལེའུ་ཉེར་གསུམ་པ། རིམས་ཀྱི་ཚ་བ་བལ་ནད་བཅོས་པ།

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །རིམས་ཞེས་བྱ་བའི་རྒྱུ་རྐྱེན་གང་ལས་བྱུང༌། །ངོ་བོ་རྒྱུ་མཚན་ཅི་ལས་མིང་དུ་བཏགས། །རིམས་ལ་དབྱེ་བའི་ནད་རིགས་དུ་ཞིག་མཆིས། །མངོན་ཚུལ་མི་འགྱུར་རྟགས་ནི་ཇི་ལྟར་འོང༌། །དེ་ལ་བཅོས་ཐབས་རྣམ་པ་དུ་ཡིས་བཅོས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས།  དྲང་སྲོང་རིག་པའི་ཡེ་ཤེས་དེས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས།།

རིམས་ཞེས་བྱ་བའི་ནད་འབྱུང་རྒྱུ་རྐྱེན་ནི། །ལྔ་བརྒྱ་དུས་ཀྱི་ཐ་མར་གྱུར་ཙ་ན། །མི་རྣམས་འདོད་པའི་དབང་གིས་ལོག་པར་སྤྱོད། །སྔགས་པ་རྣམས་ནི་རྡོ་རྗེའི་ནང་དམེ་དར། །དགེ་འདུན་བཙུན་པ་རྣམས་ནི་སྡེ་འཁྲུག་བྱེད། །མུ་སྟེགས་བན་བོན་རྣམས་ནི་ཟོར་ཁ་འཕེན། །སྐྱེ་བོ་རྣམས་ནི་མནའ་འཐབ་ཤན་དམར་བྱེད། །དེ་དུས་མ་མོ་མཁའ་འགྲོ་ཀུན་འཁྲུགས་ཏེ། །ནད་ཀྱི་ཁ་རླངས་སྤྲིན་དུ་ཆགས་པ་ལས། །བལ་ནད་རྒྱུ་གཟེར་གག་ལྷོག་འབྲུམ་ནག་འབྱུང༌། །གཞན་ཡང་དུས་བཞིའི་འབྱུང་བ་དམན་ལྷག་ལོག །དྲག་ཤུལ་དྲི་དུགས་ཁྲོ་འཇིགས་མྱ་ངན་འདོད། །ཁ་ཟས་མ་སྙོམས་པ་ཡིས་རིམས་སུ་འགྱུར།།

རྒྱུ་རྐྱེན་དེ་ཡིས་མཁྲིས་པའི་མེ་དྲོད་བསླང༌། །རྔུལ་ལ་བབས་ནས་བད་ཀན་མཁྲིས་པ་རླུང༌། །འཇུག་སྒོ་དྲུག་ཏུ་རིམ་པས་འཇུག་པའམ། །དྲིས་ཕོག་ཡམས་སུ་རིམས་ཀྱིས་འགོས་པའི་ཕྱིར། །རིམས་ཞེས་བྱ་བའི་རྒྱུ་མཚན་མིང་དུ་བཏགས།།

དབྱེ་བ་བལ་ནད་འབྲུམ་བུ་རྒྱུ་གཟེར་དང༌། །གག་ལྷོག་ཆམ་པའི་རིམས་དང་རྣམ་པ་ལྔ། །དེ་ལ་ཕྱི་མ་བཞི་པོ་འོག་ཏུ་སྟོན། །བལ་ནད་དབྱེ་བ་རྣམ་པ་གསུམ་ཡིན་ཏེ། །བབས་ས་གནས་དང་སྦྱར་ཏེ་དབྱེ་བ་དང༌། །རིམ་པ་དུས་དང་སྦྱར་ཏེ་དབྱེ་བ་དང༌། །ནད་གཞི་རིགས་དང་སྦྱར་ཏེ་དབྱེ་བ་གསུམ། །དེ་ལ་རླུང་མཁྲིས་བད་ཀན་འདུས་པ་དང༌། །གཉན་རིམས་ཞེས་བྱ་རྣམ་པ་ལྔ་རུ་བཤད། །འདར་བུ་ཡེར་བུ་རླུང་གི་རིམས་ཡིན་ཏེ། །ལེབ་རྒན་ཀླད་གཟེར་ཞེས་བྱ་མཁྲིས་པའི་རིམས། །རྨོངས་བུ་ལྐུགས་པ་བད་ཀན་རིམས་སུ་བཤད། །འདུས་རིམས་དབྱེ་བ་རྒྱུན་རིམས་རྟག་པའི་རིམས། །ཉིན་གཅིག་ཉིན་གསུམ་ཉིན་བཞི་རྣམ་པ་ལྔ། །མཁྲིས་པ་རྩར་རྒྱུག་རིམས་དང་ཀླད་གཟེར་དང༌། །རིམས་སྨྱོན་ཏྲེ་ཏྲེ་ཧོས་སུ་བཏགས་པ་གསུམ། །དོན་མཐུན་གཉན་རིམས་མིང་གི་རྣམ་གྲངས་ཡིན།།

རྟགས་ལ་སྤྱི་དང་བྱེ་བྲག་རྣམ་པ་གཉིས། །སྤྱི་ལ་མ་སྨིན་རྒྱས་དང་སྟོངས་པ་གསུམ། །དང་པོ་མ་སྨིན་རིམས་ཀྱི་མངོན་ཚུལ་ནི། །ཕྲུམ་སེར་ཡུན་རིང་མགོ་རྐང་ཚིགས་གཞི་ན། །ལུས་ལྕི་སྒྱིད་སྐྱུར་རྨི་ལམ་ཟ་ཟི་མང༌། །གཡལ་མང་རྣ་བ་འཐིབས་ལ་ཤེས་པ་མྱོས། །ཉི་མ་སྙེག་ཅིང་ཁྱད་པར་སྲོད་ལ་ན། །ཁ་ཁ་མགོ་བོ་ན་ཞིང་དང་ག་འགག །རྩ་རྒྱུད་ཕྲ་མགྱོགས་གཡོ་ཞིང་ཆུ་མདོག་རྙོག །བར་དུ་རིམས་རྒྱས་ལུས་ལྕི་རྔུལ་དྲི་མནམ། །མིག་མདངས་དམར་སེར་ལྕེ་མཆུ་སོ་དྲེག་ཆགས། །མགོ་ན་སྐོམ་དད་ཆེ་ལ་ཤེས་པ་གཡུང༌། །ཆུ་དམར་དྲི་མ་དུགས་ལ་ཀུ་ཡ་མཐུག །རྩ་རྒྱུད་ཕྲ་ལ་གྲིམས་ཤིང་མྱུར་དུ་འཕར། །ཐ་མར་ཞུ་འཁྱགས་མཚམས་སླེབ་སྟོངས་པའི་རྟགས། །དཔྱི་དང་རྐེད་པ་རུས་རྐང་ཁྱད་པར་ན། །ལུས་རྔུལ་གཉིད་ཆུང་མགོ་འཐོམ་རྣ་བ་འུར།   །ལྕེ་ནི་དམར་རྩུབ་སྐམ་ལ་སྟོང་སྐྱུགས་བྱེད། །སྨྲ་འཆལ་སྐབས་སུ་འདར་ཞིང་ཕྱི་དྲོད་ཆེ། །བྱེ་བྲག་རྟགས་ལ་རྣམ་པ་གསུམ་ཡོད་དེ། །དང་པོ་བབས་ས་གནས་ཀྱིས་བརྟག་པ་ནི། །ཐོག་མར་སྐྱི་དང་བ་སྤུར་འབབ་པ་སྟེ། །ཤེད་ཆུང་སྒྱིད་སྐྱུར་ལུས་བརྩེ་བ་སྤུ་ལྡང༌། །དེ་ནས་ལྤགས་ལ་བབས་ཏེ་ཕྲུམ་སེར་ཁྱེར། །མགོ་རྐང་ཚིགས་གཞི་ན་ཞིང་ཉི་མ་སྙེག །དེ་ནས་རྩ་ལ་བབས་ཏེ་རྩ་ཚད་སྐྱེ། །རྩ་འཁྱུག་ཤེས་པ་བྱིང་ལ་སྐོམ་དད་ཆེ། །ཁ་ཁ་ཆུ་མདོག་དམར་ལ་རྙོག་པའོ། །དེ་ནས་ཤ་ལ་བབས་ཏེ་མགོ་བོ་འཐོམ། །ལུས་ལྕི་ཤ་ཚ་བསིལ་འདོད་ཤེས་པ་ཉོག །དེ་ནས་སྣོད་དུ་བབས་ཏེ་དང་ག་འགག །དྲི་མ་འཁྲུ་སྐམ་ལྕེ་ལ་བད་ཀན་ཆགས། །དེ་ནས་དོན་ལ་བབས་ཏེ་རྩ་ཆུ་ཚ།   །ལྕེ་སྐམ་ཟ་ཟི་སྨྲ་ལ་སྐོམ་དད་ཆེ། །དེ་ནས་གཞུག་ཏུ་རུས་ལ་བབས་པའི་རྟགས། །སྣ་བུག་ཁ་ལྕེ་སྐམ་ལ་སོ་དྲེག་ཆགས། །རྩ་སྟོངས་རྣ་བ་འོན་ལ་ཤེས་པ་ཉོག །རིམ་པ་དུས་ཀྱི་སྒོ་ནས་བརྟག་པ་ནི། །དང་པོ་ཞག་གསུམ་བད་ཀན་དུས་ཡིན་ཏེ། །ཚ་བ་མགོ་ལ་བབས་པས་མགོ་བོ་ན། །ཉྭ་དང་ཚིགས་གཞི་ན་ཞིང་ཕྲུམ་སེར་ཁྱེར། །གཡལ་མང་སྒྱིད་སྐྱུར་སྐྱུག་ཅིང་ཉི་མ་སྙེག །ཚ་བ་མ་སྨིན་དྭངས་སྙིགས་དབྱེ་བའི་དུས། །དེ་ནས་ཞག་གསུམ་མཁྲིས་པའི་དུས་ཡིན་ཏེ། །ཚ་བ་དབང་པོའི་སྒོར་བབས་ཁ་ཁ་ལ། །ལྕེ་ལ་བད་ཆེ་སོ་མཆུ་དྲེག་པ་ཆགས། །སྣ་སྐམ་རྣ་བ་མི་གསང་མིག་ནག་ཆེ། །ཆུ་དམར་རྩ་གྲིམས་ཆུ་ལྟར་སྐེམ་པའི་དུས། །དེ་ནས་ཞག་གསུམ་ཁྲག་དུས་ཁྲག་ལ་བབས། །རྩ་དང་ཆུ་ཡི་ཚ་བ་གོང་བས་ཆེ། །ལྕེ་སྐམ་སྐོམ་དད་ཆེ་ལ་རྔུལ་དྲི་མནམ། །ལུས་ལྕི་ཚ་བ་དགྲ་ལྟར་བསད་པའི་དུས། །དེ་ནས་ཞག་གསུམ་རླུང་ཁྲག་འཐབ་པའི་དུས། །ཚད་པ་དོན་ལ་བབས་པས་བླ་འཆོལ་སྨྲ། །དྲན་པ་མི་གསལ་ཚབས་ཆེ་སྲོག་རྩར་འཆོར། །ཤེད་ཆུང་རྩ་བྱིང་ངོ་ནག་ལྕེ་སྐམ་རྩུབ། །ཡང་ན་སྨྱོ་འབྲོས་གཉེན་ལྟར་བསྟེན་དུས་ཡིན། །དེ་ནས་ཞག་གསུམ་རི་ཐང་མཚམས་ཀྱི་དུས། །རུས་ལ་བབས་པས་དཔྱི་སྐེད་རུས་རྐང་ན། །ཤེད་ཆུང་གདོང་སྐྱ་མགོ་འཐོམ་རྣ་བ་འུར། །གཉིད་ཆུང་ལུས་རྔུལ་བུ་ལྟར་གསོ་དུས་ཡིན། །ནད་གཞི་རིགས་ཀྱི་སྒོ་ནས་བརྟག་པ་ནི། །དང་པོ་རླུང་རིམས་བརླ་དང་རྐེད་པ་ན། །མགོ་ལུས་ཡན་ལག་ལུས་ཀུན་བརྡུངས་སྙམ་བྱེད། །གཡལ་མང་མགོ་འཁོར་རྣ་བ་སྒྲ་དང་བཅས། །གཉིད་ཡེར་མུ་འགྲམ་མགོ་བོ་ཟུག་ཅིང་གཟེར། །སྤུ་ལྡང་པགས་པ་བརྩེ་ལ་རྔུལ་མི་འབྱུང༌། །རྐང་ལག་མགོ་བོ་འདར་ཞིང་བླ་འཆོལ་སྨྲ། །ཁ་ཟས་མི་འཇུ་བཤང་གཅི་སྲི་བ་ཡིན། །ཁྱད་པར་འདར་བུ་ཕྲུམ་སེར་ཡུན་རིང་འདར། །ཡེར་བུ་གཉིད་མེད་གཡོ་ཞིང་འབྲོས་ཚུལ་སྟོན། །རླུང་རིམས་བབས་ས་རུས་ཡིན་རུས་ཀུན་ན། །རྒྱས་ས་དོན་ཡིན་ལྕེ་སྐམ་ཟ་ཟི་མང༌། །ཐ་མར་སྲོག་རྩར་ལམ་དོན་སྨྱོ་འབྲོས་བྱེད། །མཁྲིས་རིམས་བསིལ་འདོད་མགོ་ན་ཁ་ཁ་ཞིང༌། །ལུས་ཚ་འཁྲུ་ཞིང་བཤང་གཅི་ལྤགས་མིག་སེར། །རྔུལ་དབྱུང་དྲི་མནམ་མྱོས་ཤིང་སྐོམ་དད་ཆེ། །ལུད་པ་ཁྲག་བཅས་ཁ་ལ་ཐོར་པ་འོང༌། །ཁྱད་པར་ལེབ་རྒན་སྟོད་གཟེར་ལུད་པ་དམར། །སྣ་ཁྲག་འཛག་ཅིང་ཚད་རྟགས་ཆེ་བ་ཡིན། །ཀླད་གཟེར་ཚ་བ་རྒྱས་ལ་མགོ་ཟུག་ཆེ། །མུར་འགྲམ་ལྟག་རྩ་འཁྱུག་ཅིང་མཚོགས་མ་ལྕི། །མཁྲིས་རིམས་དང་པོ་བབས་ས་རྩ་ཡིན་པས། །རྩ་ཆུ་ཚ་ལ་རྩ་རྒྱས་རྩ་རྣམས་འཁྱུག །བར་དུ་རྒྱས་པའི་ས་ནི་ཁྲག་ཡིན་པས། །ཆུ་དམར་རོ་སྟོད་ཚ་ཞིང་སྣ་ཁྲག་འོང༌། །ཐ་མ་ཕལ་ཆེར་ཕོ་བར་ལམ་དོན་པས། །མཁྲིས་པས་ཕོ་བའི་མེ་དྲོད་ཕྱིར་བཏོན་ཏེ། །ལྕེ་སྐམ་མཆུ་ཐུང་ཁ་སྐམ་སོ་དྲེག་ཆགས། །དང་ག་མི་བདེ་སྟོང་སྐྱུགས་བྱེད་པའོ། །བད་རིམས་མྱོས་ཤིང་ཚ་བ་དལ་བུས་སྐྱེ། །སྐྱུག་ཅིང་མཆིལ་མ་ལུད་པ་མང་བ་དང༌། །ལུས་སྙོམ་ལྕི་ཞིང་གཉིད་ཆེ་དང་ག་འགག །བཤང་གཅི་ལྕེ་དང་སེན་མོ་པགས་མདོག་དཀར། །ཁྱད་པར་རྨོངས་བུ་ཟ་ཟི་ཉག་ཉོག་མང༌། །དྲན་པ་མི་གསལ་ཤེས་པ་འཐིབ་པ་ཡིན། །ལྐུགས་པ་མི་ངོ་མི་ཤེས་སྨྲ་བ་ལྐུགས། །དྲི་ཆེན་དྲི་ཆུ་མི་འཁྱོལ་མལ་དུ་འཆོར། །བད་རིམས་དང་པོ་བབས་ས་དང་ག་སྟེ། །ཁ་མངལ་ཟས་མི་འཇུ་ལ་དང་ག་འགག །བར་དུ་རྒྱས་ས་ཤ་དང་ཀླད་པ་སྟེ། །ལུས་ལྕི་མྱོས་དང་ལྐུགས་པར་འགྱུར་བ་ཡིན། །ཐ་མར་འཆོར་ས་མཁལ་མར་ལམ་དོན་པས། །ཆུ་སྲི་མཁལ་རྐེད་ན་ལ་རྣ་བ་འོན། །འདུས་རིམས་རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་དང་པོ་བར་དང་ཐ་མ་གསུམ། །འདུས་རིམས་ཐོག་མ་དྭངས་མར་བབས་པའི་ཕྱིར། །དྭངས་མ་བད་མཁྲིས་གཉིས་ཀྱི་གནས་ཡིན་པས། །བད་ཀན་ཤས་ཆེ་མ་སྨིན་རྟགས་མི་གསལ། །དེ་འོག་མ་ཞུ་སྨུག་པོ་ལྟ་བུར་སྣང༌། །མཁྲིས་ཤས་ཆེ་ན་མ་སྨིན་རྟགས་འགའ་གསལ། །དེ་འོག་མཁྲིས་ནད་ལྟ་བུར་མིག་ཆུ་སེར། །བར་དུ་རྒྱས་དུས་སེམས་རྨུགས་རྣ་བ་འོན། །གཉིད་ལོག་དུས་ན་ཟ་ཟི་བླ་འཆོལ་འབྱུང༌། །ལུད་པ་དམར་སེར་དཀར་པོ་འབྱར་བག་ལུ། །རྐང་དང་རྐེད་པ་རུས་ཚིགས་མ་ལུས་ན། །གྲེ་བ་ཚ་འཛེར་སྦྲིད་པ་སྣ་ཆུ་མང༌། །མིག་དམར་རྩིབ་ལོགས་ན་ཞིང་སྐོམ་དད་ཆེ། །ཚ་བ་བཤང་གཅི་རྔུལ་དང་གཉིད་མི་སྙོམས། །ཐོར་པ་འབྲུམ་ཕྲན་དམར་ནག་འབྱུང་ཡང་སྲིད། །དྭངས་མ་ཁྲག་སོགས་ཟུངས་ཀུན་ལ་གནས་ཕྱིར། །ནད་རྟགས་མི་འདྲ་སྣ་ཚོགས་ཅིར་ཡང་སྲིད། །ངོས་བཟུང་སྨིན་བསད་འབྱང་དཀའ་ས་འདྲ་ལྕི། །ངེས་ཤེས་རྣ་བ་མི་གསང་ཟ་ཟིས་ཤེས། །ཐ་མར་ལུས་ཟུངས་ཞུ་བས་རྔུལ་མང་འབྱུང༌། །སྨྲ་མང་ཕྱི་རྩ་འདར་སྲིད་སྟོང་སྐྱུགས་འོང༌། །ལུས་གྲང་ཧམ་པ་སྐྱ་འམ་མགོ་རྐང་ན། །དེ་དག་རི་ཐང་མཚམས་སུ་ཕེབས་རྟགས་ཡིན། །བཅོ་བརྒྱད་ཉི་ཤུ་གཅིག་ན་འཚོ་འཆི་ཕྱེད། །བྱེ་བྲག་རྟགས་ལ་རྒྱུན་རིམས་དྭངས་མར་བབས། །བད་མཁྲིས་ལྡན་པའི་ནད་རྟགས་འབྱུང་བ་སྲིད། །ཁྲག་ལ་བབས་པ་རྟག་པའི་རིམས་ཡིན་ཏེ། །རོ་སྟོད་ཕོ་མཆིན་མི་བདེ་སྣ་ཁྲག་འཛག །གློ་མང་ལུད་པ་མི་གཙང་མིག་ཆུ་དམར། །ཞག་གཅིག་ཚ་བའི་ཟུག་གཟེར་ལན་གཉིས་ལྡང༌། །ཤ་ལ་བབས་པ་ཉིན་གཅིག་པ་ཞེས་བྱ། །རྔུལ་མང་དྲོད་ཆེ་ལུས་དང་ཤེས་པ་ལྕི། །ཚ་བ་ནད་ཟུག་ཉིན་རེ་ལན་རེ་ལྡང༌། །ཚིལ་ལ་བབས་པ་ཉིན་གསུམ་པ་ཡི་རིམས། །ཁྱད་པར་གཉིད་ཆེ་ལུས་པོ་ཤིན་ཏུ་ལྕི། །རླུང་མཁྲིས་ཤས་ཆེ་དང་པོ་མགོ་ལ་འབབ། །བད་མཁྲིས་ཤས་ཆེ་སྐེ་དང་ཕྲག་པར་འབབ། །རླུང་དང་བད་ཀན་ཤས་ཆེ་རྐེད་པར་འབབ། །ཉིན་རེ་བདེ་ལ་ཉིན་གཉིས་བསྟུད་ནས་ན། །རུས་ལ་བབས་པ་ཉིན་བཞི་པ་ཡི་རིམས། །ཁྱད་པར་རྐེད་པ་རྐང་རུས་ཚིགས་གཞི་ན། །ཀླད་པར་བབས་ཚེ་མགོ་འཁོར་ཆམ་པས་འདེབས། །སྟོབས་ཆེ་ཁ་ཡོ་མིག་སླེ་གཟའ་ཕོག་མཚུངས། །བད་ཀན་ཆེ་ན་བྱིན་པ་ན་བར་བྱེད། །རླུང་ཤས་ཆེ་ན་ཁྱད་པར་ཀླད་པ་ན། །ཞག་གཉིས་བདེ་ལ་ཞག་རེ་ན་རེས་བྱེད། །གཉན་རིམས་མཁྲིས་པ་རྩར་རྒྱུག་ཅེས་བྱ་བ། །ནད་འདི་ཀླུ་བདུད་བྱང་སྨན་རྐྱེན་བྱས་ནས། །མཁྲིས་ཚད་ཕྱི་རོལ་རྔུལ་གྱི་སྒོར་ཞུགས་ཏེ། །ནང་དུ་མཆིན་མཁྲིས་དོན་སྣོད་གཉིས་ལ་བབས། །རང་སར་མི་གནས་རྩ་མིག་ཀུན་ཏུ་རྒྱུག །ཡར་ལ་མགོ་དང་ཀླད་པར་བད་ཡུལ་འཕྲོག །མར་ལ་མཁལ་མ་རྒྱུངས་པར་ཆུ་ཡུལ་འཕྲོག །དོན་ལ་གློ་དང་སྙིང་ལ་རླུང་ཡུལ་འཕྲོག །ཕོ་ལོང་རྒྱུ་མ་སྣོད་དུ་མཁྲིས་ཡུལ་འཕྲོག །ཤ་ལྤགས་ཕྱིར་ཤོར་སྟོབས་དང་ཁ་དོག་འཕྲོག །མཇུག་ཏུ་མཁྲིས་གནས་རླུང་གིས་སྤྱད་བྱས་ནས། །རང་གནས་སྲོག་རྩར་འཆོར་བས་འཚོ་བ་ཉུང་། །དེ་རྟགས་གྲང་ཤུམ་བྱེད་ཅིང་རྒྱུ་བ་ཞན། །རྩ་ནི་སྟོང་ལ་མྱུར་ཞིང་ཆུ་སེར་ཉོག །མགོ་དང་ཚིགས་གཞི་ན་ཞིང་ཟ་ཟི་འོང༌། །བར་དུ་ནད་རྒྱས་ཆུ་ནི་མར་ནག་འདྲ། །མིག་སྤྲིན་ལྕེ་འོག་མུར་གོང་ཤ་མདངས་སེར། །ཁ་ཁ་ལུས་ཚ་གཉིད་ཆུང་དང་ག་འགག །སེན་མོ་རྙིལ་དང་ལྕེ་མཆུ་དཀར་སེར་འོང༌། །མགོ་གཟེར་ལྕེ་མཆུ་འགས་ཤིང་སོ་དྲེག་ཆགས། །མཆིན་མཁྲིས་སྟེང་དུ་འདྲིལ་བ་མནན་མི་བཟོད། །ནད་ཀྱི་དྲི་དུགས་སྟོབས་དང་གཟི་མདངས་འཆོར། །སྨིན་པའི་ལོང་མེད་བདུན་དགུའི་དུས་ན་འཆི། །བླུན་པོ་འགའ་ཞིག་སྨིན་བྱེད་དུས་ལ་སྡོད། །རྩ་སྤུན་ཤེས་པ་ཡང་ལ་ལུས་སྟོབས་ཤོར། །ཕྱི་ཡི་དྲོད་ཆུང་ལྤགས་མདོག་གསེར་ལྟར་སེར། །དུས་འདས་རང་གནས་སླེབ་པས་ཟློག་ཐབས་མེད། །དེ་ཕྱིར་མ་སྨིན་དུས་ན་བྱ་ར་སྒྲིམས། །ཁྱད་པར་མགོར་བྲོས་ཀླད་གཟེར་སྣ་ཁྲག་འཛག །གློར་བབས་རོ་སྟོད་གཟེར་ལ་ལུད་པ་སེར། །མཁལ་བབས་མཁལ་རྐེད་ན་ཞིང་དྲི་ཆུ་སྡོམ། །ཕོ་བར་བབས་ན་ཁ་ཁ་མཁྲིས་པ་སྐྱུག །རྒྱུ་མར་བབས་ན་ཟུག་ཆེ་ཚན་ཅན་འཁྲུ། །དེ་དག་མི་འགྱུར་འཁྲུལ་མེད་ནད་རྟགས་ཡིན།།

བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་མ་སྨིན་དུས་སུ་མ་ནུ་བཞི། །ཡང་ན་སླེ་ཏྲེས་ལྔ་ཐང་སྨིན་པར་བྱ། །ཟས་དང་སྤྱོད་ལམ་བསིལ་དྲོད་སྙོམས་པར་བཅོས། །རྒྱས་པར་མ་སྨིན་སྤྱི་བཅོས་ལེའུར་བལྟ། །བར་དུ་སྨིན་རྒྱས་ཏིག་ཏ་གསེར་མེ་ཏོག །དེ་བ་པར་པ་ཏ་དང་ལི་ག་དུར། །ཨ་རུ་ར་ཡི་ཐང་བཏང་རྔུལ་མང་དབྱུང༌། །ཚ་སྟོབས་ཆེ་ན་དེ་སྟེང་ག་བུར་དང༌། །གི་ཝཾ་ཅུ་གང་གུར་ཀུམ་བོང་ང་དཀར། །ཏིག་ཏ་ཀ་ར་སྦྱར་ལ་ཐང་གིས་དབུལ། །སྨན་ཞུ་རྔུལ་དབྱུང་རིམས་ཚད་ཀུན་ལ་ཤེས། །སྐྱེད་ཆུང་མིག་ཆུ་སེར་ན་བཤལ་གྱིས་སྦྱང༌། །འབྲས་བུ་གསུམ་དང་དུར་བྱིད་པི་པི་ལིང། །ནཱ་ག་གེ་སར་སྦྲང་རྩི་ཀ་ར་སྦྱར། །རིམས་ཀུན་གསར་རྙིང་མེད་པ་སེལ་བར་བྱེད། །ཆུ་ལྕག་བྲབས་ལ་ནད་དག་བསིལ་གྱིས་བཅད། །ཟས་དང་སྤྱོད་ལམ་རྒྱས་ཚད་སྤྱི་དང་འདྲ། །ཁྱད་པར་རིམས་སོ་ཅོག་ལ་ཞོ་གནོད་དེ། །བཅུ་གསུམ་འདས་ནས་འོ་མ་བདུད་རྩིར་མཚུངས། །ཐ་མ་རི་ཐང་མཚམས་སུ་སད་མདའ་བཏང༌། །ཁ་ཟས་གློད་ཅིང་ཚད་གཞུག་གདོན་པའི་ཐབས། །རི་ཐང་མཚམས་ཀྱི་ལེའུར་ཤེས་པར་བྱ། །བིག་པན་སྲད་དཀར་སྙ་ལོ་ཀྱི་ལྕེ་བཞི། །ཚ་བའི་སྟོབས་སྦྱར་དུ་བ་མ་ཤོར་བསྲེགས། །ཐལ་བར་མགོ་ན་ཨ་རུ་ཟུར་ལྔ་སྡེབ། །སྣ་ཁྲག་འཛག་ན་མཚེ་ཡི་ཐལ་བ་སྡེབ། །གློ་ལུ་བ་ལ་རྒྱ་སྐེགས་ཐལ་བ་སྡེབ། །རྩིབ་ལོགས་གཟེར་ན་མ་ནུའི་ཐལ་བ་སྡེབ། །མིག་ཆུ་སེར་ན་ཤོ་རྩའི་ཐལ་བ་སྡེབ།  །ཚིགས་གཞི་ལ་བབས་རྟ་ལྤགས་ཐལ་བ་སྡེབ། །དྲི་མ་འགགས་ན་སུག་པའི་ཐལ་བ་སྡེབ། །ཆུ་སྲི་བ་ལ་གཟེ་མའི་ཐལ་བ་སྡེབ། །རླུང་གི་རིམས་ལ་རུས་ཁུས་འཕུལ་ལ་བཏང༌། །རི་ཐང་མཚམས་སུ་ཆང་ཁྱོར་རེ་ཡིས་དབུལ། །ཆང་འཐུངས་གཉིད་ལོག་ག་བུར་ནག་པོ་ཡིན། །རླུང་ལྡན་རིམས་རིགས་ཀུན་ལ་བསྔགས་པ་སྟེ། །ཁྱད་པར་རི་ཐང་མཚམས་ཀྱི་བདུད་རྩི་ཡིན། །མ་སྨིན་རི་ཐང་མཚམས་གཉིས་རིམས་ལ་གཅེས། །དེ་ཕྱིར་མཁས་པས་འདི་དུས་གཟབ་པར་བྱ། །བྱེ་བྲག་བཅོས་པའི་ཐབས་ལ་རྣམ་གསུམ་ལས། །བབས་ས་གནས་དང་སྦྱར་ལ་བཅོས་པ་ནི། །བ་སྤུར་བབས་དུས་ལྟོ་སྒུག་ཆུ་སྐོལ་བཏང༌། །ཁ་ཟས་བསིལ་ཕྱོགས་མི་བཏང་སྨིན་པར་དཀའ། །བསིལ་ཐང་ཕྱེ་མ་མི་བསྟེན་ཚ་བ་རྙོགས། །སྣུམ་བཅུད་མི་བཏང་ཚ་བ་རུས་ལ་ཞེན། །དེ་ནས་ལྤགས་བབས་མ་ནུ་བཞི་ཐང་བཏང་། །ཚ་བ་ཆེ་ན་འབྲས་གསུམ་སླེ་ཏྲེས་ཐང༌། །འདི་དུས་མི་བསྲེག་ཚ་བ་ཁོང་དུ་འཆོར། །དྲོད་བཅུད་མི་བསྟེན་རྩི་ལྟར་ཞེན་པར་འགྱུར། །བསིལ་ཕྱེ་མི་བསྟེན་ཚ་བ་སྐྱེ་ལམ་འགག །ཁྱད་པར་གཏར་ག་བཤལ་དང་བསིལ་བཅུད་སྤང༌། །ཚ་བའི་ནད་ལ་བྱ་འཆོར་རྔུལ་མི་དབྱུང་། །དེ་ནས་རྩར་བབས་བཟང་དྲུག་བ་ཤ་ཀ །ག་དུར་ཀར་སྦྱར་ཟས་སྐོམ་བསིལ་དུ་བསྟེན། །འདི་དུས་ཐང་བཏང་དང་ག་འགག་པས་སྤང༌། །སྣུམ་བཅུད་གབ་འགྱུར་བསྲེགས་ན་ཚ་བ་འདྲེགས། །སྐྱུར་ཤོར་ངན་ཁྲག་རྩར་ཞེན་གསོ་བ་དཀའ། །ཤར་བབས་གི་ཝཾ་བསིལ་གསུམ་ཨ་རུ་ར། །ཀ་ར་སྦྱར་བའི་བསིལ་འཇམ་ཕྱེ་མ་བསྟེན། །བསྲེགས་ན་གཟེར་འདེབས་གཏར་ན་རྗེས་མི་ཆོད། །འདི་དུས་རྔུལ་དུ་གདོན་པ་ཤིས་པ་ཡིན། །ཐང་བཏང་རྩར་ཞེན་བཅུད་ཤོར་མེ་རུ་འབར། །ག་བུར་མི་བཏང་རླུང་འཁྲུགས་ཚ་བ་འཐོར། །སྣོད་བབས་བྱི་ཚེར་ཏིག་ཏ་གསེར་མེ་ཏོག །བོང་ང་ག་དུར་དུག་ཉུང་ཀ་ར་སྦྱར། །རྔུལ་ཐང་བསྲེག་དང་དྲོད་བཅུད་ཤིན་ཏུ་གནོད། །སྣོད་དུ་བབས་ཚེ་ཐང་བཤལ་བསྔགས་པ་ཡིན། །དོན་བབས་ཚ་བ་རབ་འབྲིང་བྱེ་བྲག་གིས། །ག་བུར་ཙན་དན་གི་ཝཾ་གཙོ་བྱས་ལ། །བསིལ་གསུམ་ག་དུར་ཏིག་ཏ་བོང་ང་དཀར། །ཧོང་ལེན་ཀ་ར་སྦྱར་བའི་ཕྱེ་མ་བསྟུད། །རླུང་མཁྲིས་བད་ཀན་ཁྲག་ཤས་ཆེ་བ་ལ། །མེ་སྦྱོངས་རྔུལ་གཏར་ཅུང་ཟད་བསྟེན་པར་བྱ། །རྔུལ་གྲང་རླུང་འཁྲུགས་བཅུད་སྔས་ཚ་བར་ལྡོག །རུས་བབས་སྲེ་ལོང་བུར་ཞོ་ཚོ་ཁུས་བསད། །ཟས་ཀྱིས་ངོ་གླན་བསིལ་གྱིས་ཚད་གཞུག་གདོན། །བསིལ་དྲགས་ཟས་ཡེན་ཟུངས་འཛད་ལ་རྒལ་འགྱུར། །རླུང་འཕེལ་གསར་འཇམ་བྲིད་ལ་དྲུག་བདུན་བསྲེག །རིམ་པ་དུས་དང་སྦྱར་ཏེ་བཅོས་པ་ནི། །བད་ཀན་དུས་སུ་འབྲས་གསུམ་མ་ནུ་བཞི། །སླེ་ཏྲེས་བྱི་ཚེར་ཏིག་ཏ་དྲོ་འཇམ་བསྟེན། །རྔུལ་དབྱུང་ཚ་བའི་ཁ་བྲིད་གཉེན་ལྟར་བསྟེན། །མཁྲིས་དུས་ཏིག་ཏ་གསེར་གྱི་མེ་ཏོག་དང༌། །ཨ་རུ་ར་ཡི་བསྡུས་གྲང་བཏང་བར་བྱ། །བཟང་དྲུག་གསེར་གྱི་མེ་ཏོག་བ་ཤ་ཀ །ག་དུར་ཀ་ར་སྦྱར་བའི་ཕྱེ་མ་བསྟེན། །མགོ་བོ་ན་ན་དཔྲལ་རྩ་ཁ་ཕྱེ་གཏར། །ཆུ་ལྕག་བྱས་པས་ཚ་སེལ་སྐྲ་མི་འབྱི། །ཁྲག་དུས་ག་བུར་ཙན་དན་གི་ཝཾ་དང༌། །བསིལ་གསུམ་ག་དུར་ཀ་རའི་ཕྱེ་མ་བསྟུད། །ཁྲག་མཁྲིས་སྟོབས་ཆེ་ཅུང་ཟད་གཏར་ཞིང་སྦྱང༌། །བྱིང་འཐིབས་རྔུལ་གདོན་ཟས་སྤྱོད་བསིལ་དུ་བསྟེན། །རླུང་ཁྲག་འཐབས་དུས་ཛཱ་ཏི་སྙིང་ཞོ་ཤ། །བིག་པན་ཐལ་བ་བུར་དཀར་སྦྱར་ལ་བཏང༌། །ག་བུར་རྒྱལ་བློན་གསུམ་དང་ལྟག་པ་སྤྲད། །དྲན་མེད་སྨྲ་འཆལ་མི་ལ་འཛིན་ནམ་སྣོམ། །ཟས་བྱིན་ཁྱེམ་བུ་སོས་འཛིན་མིག་རྩ་གྲུང༌། །ག་བུར་ཆང་སྦྱར་བཏང་ལ་དྲུག་པ་བསྲེག  ཁ་ཟས་བསིལ་དྲོད་སྤེལ་བཏང་སྒོག་ཆབ་བསྔགས། །སྐྱེད་ཆུང་ཨ་སོ་གཏར་ལ་རྒྱལ་བློན་གསུམ། །ཛཱ་ཏི་ཀ་ར་སྦྱར་ལ་བཏང་བར་བྱ། །བཅུ་གསུམ་ཕན་ཆད་ཚ་བའི་རི་ཐང་མཚམས། །ཆང་གསར་ཚོ་ཁུ་བུར་ཞོ་སྲེ་ལོང་ཐང༌། །སད་མདས་ངོ་གླན་ཆ་ཡིས་བྲིད་ལ་གློད། །སྐྱུ་རུ་ཙན་དན་ག་བུར་བིག་པན་ཐལ། །ཀར་སྦྱར་ཚད་ལྷག་སྐམ་ཕྱིར་བསྲིངས་ལ་བཏང༌། །ཚ་བ་ཐོན་ནས་གང་འཕྲོད་ཟས་ཀྱིས་གསོ། །ནད་གཞིའི་རིགས་དང་སྦྱར་ཏེ་བཅོས་པ་ནི། །རླུང་རིམས་དང་པོ་བུ་རམ་གོ་སྙོད་ཐང༌། །རུས་བཅུད་གསུམ་དང་སླེ་ཏྲེས་ཆིག་ཐང་དང༌། །བྱི་ཚེར་ག་དུར་སླེ་ཏྲེས་སྒ་ཐང་བཏང༌། །སྨིན་ནས་བཟང་དྲུག་སླེ་ཏྲེས་བིག་པན་ཐལ། །ཀ་རའི་ཕྱེ་མ་རུས་ཁུས་འཕུལ་ལ་བཏང་། །གཏར་བཤལ་ག་བུར་འདི་ལ་ཉེ་མི་རུང༌། །བསིལ་ཤ་གསར་པ་མར་གསར་ཡོས་ཐུག་བསྟེན། །ཚ་བ་ཆུང་ན་ཞག་དགུ་ལོན་པ་དང༌། །འདར་བུའི་ལྟག་ཁུང་ཡེར་བུའི་ཨན་སྟོང་བསྲེག །མ་ཐུབ་སྲོག་རྩར་ལམ་དོན་སྨྱོ་བ་ན། །ཛཱ་ཏི་གུ་གུལ་རུ་རྟ་ཨ་ག་རུ། །སྒོག་ཐལ་བུར་དཀར་སྦྱར་ལ་རུས་ཁུས་དབུལ། །རུས་བཅུད་ཁུ་བར་ཛཱ་ཏི་བཏབ་ལ་བཏང༌། །མ་ཐུབ་གཞུག་ཆུང་ལྔ་བདུན་སྦྱོར་བ་བྱ། །དྲུག་བདུན་ཨན་སྟོང་ལྟག་པའི་སྡུད་སྒོ་བསྲེག །དེ་ལྟར་བཅོས་པས་མ་ཐུབ་སྲོག་རླུང་ལོག །རྩ་སྤུན་རྔམ་པ་རྩེག་ན་འཆི་བ་ཡིན། །སྣ་ལོན་དྲན་པ་གསལ་ལ་རྩ་ཤེད་རྒྱས། །ཆུ་དྭངས་ལྕེ་རློན་རྐང་པའི་དྲོད་རྙེད་ཅིང༌། །སྣབས་སྐམས་འགོག་སླ་རྣ་བ་གསང་ན་འཚོ། །མཁྲིས་རིམས་དང་པོ་ཏིག་ཏ་བྱི་ཚེར་ཐང༌། །བྱི་ཚེར་ག་དུར་རྩ་མཁྲིས་སྐྲ་བཟང་དང༌། །ཨ་རུ་ག་དུར་ཏིག་ཏ་སྐྲ་བཟང་བཏང༌། །སྨིན་ནས་ག་དུར་གི་ཝཾ་ཙན་དན་གསུམ། །ཚད་སྟོབས་སྦྱར་ལ་བསིལ་གསུམ་ལི་ག་དུར། །ཏིག་ཏ་དུག་ཉུང་གསེར་མེ་བོང་ང་དཀར། །ཧོང་ལེན་བ་ཤ་ཀ་དང་ཀ་ར་སྦྱར། །ཚ་བ་ཆེ་ལ་ཁྱད་པར་མིག་ཆུ་སེར། །འབྲས་གསུམ་ལྕུམ་རྩ་དུར་བྱིད་ཐང་བཤལ་བྱ། །ཁྱད་པར་ལེབ་རྒན་སྣ་ཁྲག་འཛག་པ་ལ། །ཙན་དན་མཚེ་ཐལ་དོམ་མཁྲིས་སྦྱར་ལ་བཏང༌། །སྨིན་མའི་བར་དུ་སྤྲ་བ་ལྔ་ཡིས་བསྡམ། །གློ་ལུ་སྟོད་གཟེར་ལུད་པ་དམར་བ་ན། །ཙན་དན་དཀར་པོ་གུར་ཀུམ་ཅུ་གང་དང༌། །རྒྱ་སྐྱེགས་ཤིང་ཐལ་ཀ་ར་སྦྱར་བྱས་ལ། །ཚོས་ཁུས་འཕུལ་བཏང་གློ་རྩ་ཅུང་ཟད་གཏར། །ཀླད་པ་གཟེར་ན་མུ་འགྲམ་འཁྱུག་རྩ་བསྲེགས། །དཔྲལ་བའི་རྩ་ལ་ཁྲག་རླངས་ཐོན་ཙམ་གཏར། །གླ་རྩི་སྤང་སྤོས་ཕུར་ཐལ་ཨ་རུ་ར། །ཤུག་པ་སྤང་རྒྱན་དཀར་སྦྱར་མཚོགས་སྟེང་བསྲེག །ཐ་མ་ཕོ་བར་ལམ་དོན་ཐང་བཤལ་བྱ། །དེ་རྗེས་ཛཱ་ཏི་ཤིང་ཀུན་ཀ་ཀོ་ལ། །བུར་ཆང་བཏང་ལ་ཚོ་ཁུ་ཆང་འཇམ་བསྟེན། །དེ་ལྟར་མ་བཅོས་ཕོ་བའི་མེ་ཤི་ནས། །ཁ་ཟས་མི་འཇུ་སྟོང་སྐྱུགས་བྱེད་ན་འཆི། །གོང་བཞིན་སྣ་ལོན་རྟགས་ཚང་འཚོ་བར་ངེས། །བད་ཀན་རིམས་ལ་དང་པོ་མ་ནུ་བཞི། །བྱི་ཚེར་ག་དུར་བ་ཤ་ཀ་དང་སྒ། །གླ་སྒང་པར་པ་ཏ་ཡི་སྨིན་ཐང་བཏང༌། །སྨྱུང་བར་བྱ་ཞིང་ནང་ནུབ་ཆུ་སྐོལ་བཏུང༌། །སྨིན་ནས་བཟང་དྲུག་ཏིག་ཏ་འབྲས་བུ་གསུམ། །ཨུཏྤལ་ག་དུར་ཀ་ར་སྦྱར་ལ་བཏང༌། །འབྲས་བུ་གསུམ་དང་ཏིག་ཏ་ལི་ག་དུར། །བསྡུས་ཐང་དྲོན་མོ་བཏང་ལ་རྔུལ་མང་དབྱུང༌། །འབྱང་དཀའ་ཚ་བ་མི་ཆག་བཤལ་གྱིས་སྦྱང༌། །ཁྱད་པར་རྨོངས་བུའི་རིགས་ལ་ར་དཀར་པོའི། །རྭ་རུ་བསྲེགས་པའི་གཞོབ་དང་བལ་ཚི་སྦྱར། །ལུས་ཀུན་བྱུགས་ལ་ག་བུར་རྒྱལ་བློན་གསུམ། །ཁོང་དུ་བཏང་ལ་ཞུ་ནས་བ་སྤུར་དབྱུང་། །བླ་འཆོལ་མང་ན་ལྟག་པའི་སྐྲ་མཚམས་བསྲེག །སྐྱུགས་སུ་བྱུང་ན་ཚིགས་པ་དང་པོ་བསྲེག །ཁ་ལྐུགས་ག་བུར་རྒྱལ་བློན་གསུམ་པ་དང༌། །ཛཱ་ཏི་སྦྱར་བཏང་རྐང་མཐིལ་མཐེབ་སྙིང་བསྲོ། །དེ་རྗེས་ལྕེ་འོག་རྩ་ལ་གཏར་བར་བྱ། །མཁལ་མར་ལམ་དོན་གཟེ་མ་པི་པི་ལིང་། །བུ་རམ་བསྡུས་ཐང་དྲོན་མོས་མཁལ་སྣ་གླན། །དེ་ལྟར་མ་བཅོས་མཁལ་མའི་ཟུངས་ཉམས་ཏེ། །རྐང་པའི་དྲོད་ཉམས་དབུགས་ཐུང་སྣ་ཆུ་འོང༌། །བླ་རྩ་བྲོས་ན་མི་ཐུབ་འཆི་བར་ངེས། །སྣ་ལོན་གོང་གི་རྟགས་ཚང་འཚོ་བ་ཡིན། །འདུས་རིམས་བཅོས་ཐབས་སྤྱི་དང་བྱེ་བྲག་གཉིས། །སྤྱི་བཅོས་སྨིན་དང་ཞི་བྱ་གསོ་བ་གསུམ། །དང་པོ་སྨིན་བྱེད་དྭངས་མར་བབས་པ་ཡིས། །ཕོ་བ་དྲོད་ཉམས་རྩ་ལམ་འགགས་པའི་ཕྱིར། །ཅི་རིགས་སྨྱུང་བྱ་ནང་ནུབ་ཆུ་སྐོལ་བཏུང༌། །འབྲས་སམ་ཡོས་ཐུག་སྤོད་བཅས་ཚ་བ་བཏང༌། །བཅའ་སྒ་བྱི་ཚེར་པར་པ་ཏ་གསུམ་ལ། །གླ་སྒང་བསྡེབས་ཏེ་བསྐོལ་ཐང་རྩེ་འཇམ་དང༌། །སླེ་ཏྲེས་གླ་སྒང་རྩ་མཁྲིས་སྒ་ཐང་བཏང༌། །བད་རླུང་ཆེ་ན་མ་ནུ་བཞི་ཐང་སྟེ། །ཁྲག་མཁྲིས་ཆེ་ན་འབྲས་བུ་གསུམ་ཐང་བཏང༌། །ཟས་སྤྱོད་ཚ་གྲང་གཉིས་སྤང་དྲོ་འཇམ་བསྟེན། །དེ་ཡི་སྨིན་རྟགས་རྔུལ་གཡོས་ཕྲུམ་སེར་སངས། །དེ་འོག་བར་དུ་ཞི་བས་བཅོས་བྱ་སྟེ། །དེ་ཡང་བཅོས་པའི་དུས་ལ་གསར་རྙིང་གཉིས། །གསར་དུས་ཉེས་པའི་སྟོབས་ཀྱིས་བཅོས་པ་དང་། །ཚ་བའི་སྟོབས་དང་སྦྱར་ནས་བཅོས་པ་གཉིས། །ཉེས་པའི་སྟོབས་སྦྱར་རླུང་མཁྲིས་བད་ཀན་གསུམ། །གང་ཤས་ཆེ་བ་སྔོན་ལ་ཞི་བར་བྱ། །ཆ་མཉམ་བད་མཁྲིས་རླུང་གསུམ་རིམ་པས་བཅོས། །རླུང་ལ་སླེ་ཏྲེས་མཁྲིས་ལ་ཨ་རུ་ར། །བད་ཀན་པི་པི་ལིང་གི་ཆིག་ཐང་བཏང༌། །ཆ་མཉམ་པ་ལ་འབྲས་བུ་གསུམ་ཐང་བསྟེན། །ཟས་སྤྱོད་སྨན་དཔྱད་དེ་ཡི་གཉེན་པོར་སྦྱར། །ཚ་བའི་སྟོབས་དང་སྦྱར་ཏེ་བཅོས་པ་ནི། །ཡུལ་དུས་ན་ཚོད་ནད་ཁམས་ཟས་སྤྱོད་ཀྱིས། །ཚ་སྟོབས་ཆེ་ཆུང་གཉིས་སུ་འགྱུར་བའི་ཕྱིར། །སྟོབས་ཆེ་སྨིན་དུས་བསྡད་པའི་ལོང་མེད་པས། །ཞག་གཅིག་སྨྱུང་བྱས་ནང་པར་གསར་ཤ་བྱིན། །དེ་ཡི་ནང་པར་གསེར་ཕུད་སྐྱུགས་ཀྱིས་དྲང་། །སྐྱུགས་བྱས་ནང་པར་ཧོང་ལེན་བཤལ་གྱིས་སྦྱང༌། །དེ་ཡིས་ཕོ་བའི་བད་མཁྲིས་བསལ་བྱས་ལ། །ག་བུར་རྒྱལ་བློན་གསུམ་ལྔ་བདུན་པ་འམ། །རིན་ཆེན་ཞགས་པ་ལུས་ཟུངས་ཚ་སྟོབས་སྦྱར། །སྐབས་སུ་སྨན་བཏང་རྗེས་ལ་ཚད་ལམ་བསལ། །སྣོད་ཚད་ཆེ་ན་མངར་བའི་སྨན་གྱིས་སྦྱང་། །སྟོད་གཟེར་ལུད་པ་དམར་སེར་གནས་སྦྱར་གཏར། །ཚ་བའི་རླངས་གདོན་ཁྲག་བོངས་ཆེར་མི་རུང་། །སྟོབས་ཆུང་བྱ་ཀྲྀ་སྐྱེར་པ་པ་ཏོ་ལ། །ཧོང་ལེན་སྒྲོན་ཤིང་གླ་སྒང་འབྲས་བུ་གསུམ། །བསྐོལ་གྲང་བཏང་རྗེས་གཙོ་བོ་བརྒྱད་པ་ལ། །གླ་སྒང་པར་པ་ཏ་དང་དུག་མོ་ཉུང་། །པ་ཏོ་ལ་དང་རྩ་མཁྲིས་བསྣན་ལ་བཏང་། །ཟླ་གཅིག་ཕར་འདས་རིམས་རྙིང་ཚ་བ་རྣམས། །སླེ་ཏྲེས་པི་པི་ལིང་དང་འབྲས་བུ་གསུམ། །ཐང་མང་བཏང་རྗེས་ཉི་ཤུ་རྩ་ལྔ་སྦྱར། །སྐབས་སུ་རྔུལ་དབྱུང་མིག་ཆུ་སེར་ན་སྦྱང་། །བཤང་གཅི་ཕྱེན་འགགས་པ་ལ་བྱ་ཀྲི་དང་། །གཟེ་མ་འོ་མ་བུར་རྙིང་བསྐོལ་བ་ཕན། །མདོག་སྔོ་ཤ་སྐམ་དང་ག་བདེ་བ་ན། །ཚ་བ་ཕྱི་རུ་བྱེར་བས་ཆུ་ལྕག་ཕན། །རྩ་ཁྲིད་ན་འཕྲེང་ལྕི་ན་ཅུང་ཟད་གཏར། །ཚིགས་གཞི་རུས་པ་ན་སྐྲངས་ཆུ་ལུམས་བྱ། །རིམས་རྗེས་སྣ་རྩ་སྐྲངས་ན་གང་ཉེ་གཏར། །གུར་ཀུམ་ཀ་ར་མར་གསར་སྣ་སྨན་བཏང་། །བྲག་ཞུན་སྟག་ཤ་ཧོང་ལེན་དྲི་ཆུ་བྱུག །ཀོ་ལེར་ན་ཞིང་གཟེར་ན་ཚན་དུགས་བྱ། །ཤེད་མེད་སྨད་ཚད་སྐྱེས་ན་སྨད་འདྲེན་བཏང་། །ཟུངས་ཟད་རོ་སྨད་དྲོད་བྲལ་འཇམ་རྩི་བྱ། །སྟོབས་མེད་གཏིང་ཚད་མ་ཐོན་རླུང་སྐྱེས་ན། །ཏིག་ཏའི་སྨན་མར་སྦྲང་རྩི་སྦྱར་ལ་བསྟེན། །མདོར་ན་ཚ་བ་ནད་ཟུངས་ཀུན་འབྲེལ་ཕྱིར། །ཐོར་བུ་སྣ་ཚོགས་མ་ངེས་འབྱུང་བས་ན། །ཚ་བ་སྤྱི་དང་འཕྲུལ་ཏེ་ནད་སྣ་བསལ། །ཐ་མ་རི་ཐང་མཚམས་སུ་ཟུངས་གསོ་སྟེ། །འདུས་རིམས་ཡིན་ཕྱིར་ངེས་མེད་འཁྲུལ་སོ་ཆེ། །ལེགས་པར་བརྟགས་ནས་ཁ་ཟས་རིམ་གྱིས་གློད། །འདྲར་སྣང་བློ་བྲིད་འཕྲང་ལ་མ་ཤོར་གཅེས། །དེ་ནས་འདུས་རིམས་བྱེ་བྲག་གསོ་བ་ནི། །རྒྱུན་རིམས་པ་ཏོལ་(དུག་ཉུང་ཧོང་ལེན་)གསུམ་པའི་ཐང་བཏང་ཞིང་། །ཁྱད་པར་བད་ཀན་ཤས་ཆེ་སྒྲེག་ཅིང་སྐྱུག །མི་འཇུ་ཡི་ག་འགགས་ན་(སོ་ཆ་རྒྱམ་ཚྭའི་)སྐྱུགས་ཀྱིས་དྲོང་། །མཁྲིས་བབས་མིག་ཆུ་སེར་ན་(དུར་བྱིད་རྒུན་འབྲུམ་ཨིཎྜ་བཞི་ཐང་)བཤལ་གྱིས་སྦྱང་། །སྲིན་ཁྲོས་ཕོ་བར་ཟུག་ལ་(གོ་བྱེས་བུ་རམ་རིལ་བུ་)སྦྱར་བ་བསད། །རྟག་པའི་རིམས་ལ་ཧོང་ལེན་(པ་ཏོ་ལ་གླ་སྒང་བ་སྤུ་པ་ཏྲ་)ལྔ་པ་སྤྱར། །གར་བབས་རྩ་ལ་ཅི་རན་རིགས་པས་གཏར། །ཉིན་གཅིག་པ་ལ་གླ་སྒང་(པ་ཏོ་ལ་འབྲས་གསུམ་ནིམ་པ་དུག་ཉུང་རྒུན་འབྲུམ་)བརྒྱད་པ་བཏང་། །གཙོ་བོ་རྔུལ་མང་དབྱུང་ཞིང་ཆུ་ལྕག་བྱ། །ཉིན་གསུམ་པ་ལ་བཅའ་སྒ་(ཙན་དན་ཏིག་ཏ་སླེ་ཏྲེས་)བཞི་ཐང་བཏང༌།  །བྱེ་རུག་སྤོས་དཀར་ཡུང་སྐྱེར་(བྲག་ཞུན་དུག་ཉུང་བོང་ང་འབྲས་གསུམ་བཅུ་པ་སྦྲང་དང་)སྦྱར་ལ་བྱིན། །ཉིན་བཞི་པ་ལ་སླེ་ཏྲེས་(གླ་སྒང་སྐྱུ་རུ་)གསུམ་ཐང་བཏང་། །སླེ་ཏྲེས་བྲག་ཞུན་སྦྱར་བྱུགས་མཁན་ཆུས་བྲན། །རུ་རྟ་ཨ་རུ་འོ་མའི་འཇམ་རྩི་བྱ། །ཚིགས་པ་ཁ་བྱེ་ཟུག་གཟེར་གང་ཆེ་བསྲེག །ཀླད་པར་བབས་ན་སྣ་བཤལ་བཏང་བ་འམ། །ཆུ་ཚན་གླ་རིལ་དུགས་བྱ་ནང་རྩ་སྦྱང་། །རྗེས་ལ་རྩ་བ་འབྲས་བུའི་སྨན་མར་སྦྱར། །ཀུན་ལ་པ་ཏོ་ལ་དང་པུ་ཙེ་ཤེལ། །གླ་སྒང་ཤིང་མངར་ཨ་རུ་ར་དང་ལྔ། །པ་ཏོལ་ལྔ་འདིའི་ཐང་ཕྱེ་གང་རིགས་ཕན། །རིམས་གང་ཅིས་ཀྱང་ཚ་བ་མི་ཆག་ན། །འཚོ་དཀའ་ལག་པའི་རྩ་ལ་ལན་འགའ་གཏར། །ཉིན་གཅིག་མི་གཏར་བཞི་པོ་རང་རང་རྩ། །གཏར་བས་རིམས་ཀྱི་ཚ་བ་རྩད་ནས་འདོན། །ཀུན་ལ་རི་ཐང་མཚམས་སུ་གཟབ་པ་གཅེས། །གཉན་རིམས་བཅོས་ཐབས་སྤྱི་དང་བྱེ་བྲག་གཉིས། །སྤྱི་བཅོས་དང་པོ་རྩ་ཡི་འབྲོས་འཕྲང་བསྡམ། །གཉིས་པ་གཉེན་པོ་སྦྱར་བས་བསད་པ་དང་། །གསུམ་པས་རོ་དབྱུང་བཞི་པས་ནད་ལྷག་བསལ། །དང་པོ་རྩ་ཡི་འབྲོས་འཕྲང་བསྡམ་པ་ནི། །མི་དོམ་མཁྲིས་པ་གླ་རྩི་བོང་ང་དཀར། །རྒུ་དྲུས་ཆོས་སྨན་བྲག་ཞུན་ཡུང་བ་རྣམས། །ལོ་བརྒྱད་ཆུ་ལ་སྦྱངས་ལ་ཁོང་དུ་བཏང་། །སྨིན་བྱེད་ཐང་དང་ལྟག་པ་སྤྲད་པར་ཤིས། །སྡུད་སྒོ་མཚོགས་མ་དྲུག་པ་བཅུ་གསུམ་པ། །ནང་ལོང་འཕར་རྩ་སྤྲ་བ་བཞི་ལྔས་མནན། །དེས་ནི་རྩ་ཡི་འབྲོས་འཕྲང་འགེགས་པར་བྱེད། །གཉེན་པོ་འཛིན་པ་བོང་ངའི་མེ་ཏོག་དང༌། །ལྷོག་དུག་ཨ་རུ་ཤ་ཆེན་ཆ་ཡིས་བསྐྱེད། །དྲི་ཆུའི་རིལ་བུ་སྲན་ཙམ་ཐེངས་འགའ་བཏང༌། །ལྕི་རྔུལ་ཕྱི་ཚད་ཆེ་ན་གསོད་པའི་རྟགས། །གཟེར་བཤལ་རོ་དབྱུང་མ་ཐེབས་བསྐྱར་ལ་སྦྱང༌། །བསྐྱར་ཡང་མི་འཇུག་སྲོག་རླུང་ཉམས་ཏེ་འཆི། །ལེགས་འཁྲུ་མདོག་སེར་དྲི་ཆེ་རོ་ཐོན་རྟགས། །མཁྲིས་པ་ཐོན་ཆུང་མིག་སེར་བསྐྱར་ལ་བཏང༌། །འབྱོངས་ན་མིག་སྤྲིན་འཕྲལ་ལ་དཀར་པོར་འགྲོ། །ཕྱེ་མ་གི་ཝཾ་གུར་ཀུམ་དུག་མོ་ཉུང༌། །ཧོང་ལེན་ཏིག་ཏ་སྐྱེར་ཤུན་བོང་ང་དཀར། །ཀྱི་ལྕེ་གུ་གུལ་ལྕུམ་རྩ་སྒྲོ་པུཥྤ། །ཞིབ་བཏགས་དུས་བཞིར་ཆུས་འཕུལ་ཚད་ལྷག་འཇོམས། །ཚ་ཡང་ག་བུར་སྲོག་རླུང་ལྡོག་ཕྱིར་སྤང༌། །གཉན་མ་སོད་པར་གཏར་དང་དཀར་མངར་སྤང༌། །འབྲས་ཐུག་ཡོས་ཐུག་བསྐོལ་གྲང་ཆུ་གྲོག་བཏང༌། །བྱེ་བྲག་གར་བབས་ནད་ཀྱི་དམིགས་བརྟགས་ལ། །མགོར་བབས་དོམ་མཁྲིས་གངས་ཐིགས་གི་ཝཾ་དང༌། །ཨ་བྱག་བོང་ང་ཀ་ར་སྦྱར་ལ་བཏང༌། །མཚོགས་མ་སྡུད་སྒོ་མུར་འགྲམ་མེ་ཡིས་མནན། །སྣ་ཁྲག་འཛག་ན་གུར་ཀུམ་དོམ་མཁྲིས་དང༌། །མཚེ་ཐལ་སྙ་ལོ་སྲད་དཀར་ཀྱི་ལྕེ་བ། །རྡོ་དྲེག་སེར་པོ་ཀ་ར་སྦྱར་ལ་བཏང་། །གློར་བབས་ཙན་དན་གུར་ཀུམ་ཅུ་གང་དང༌། །སྐྱེར་ཤུན་ཤིང་མངར་བོང་ང་དཀར་པོ་དང་། །ཀ་ར་སྦྱར་བཏང་དྲུག་འགོ་སྣོད་ཀ་གཏར། །མཁལ་བབས་གླ་རྩི་གུར་ཀུམ་སུག་སྨེལ་དང༌། །སྐྱེར་ཤུན་བྲག་ཞུན་ཉི་དགའ་ཨ་རུ་ར། །ཤུག་ཚེར་སྦྱར་བཏང་བཅུ་བཞི་རྩ་ནག་བསྲེག །ཕོ་བར་བབས་ལ་སྤྱི་དང་ཁྱད་པར་གཉིས། །སྤྱི་རུ་ཕོ་བར་བབས་པའི་རིམས་རྣམས་ལ། །ཕག་རིལ་ཐལ་བ་དོམ་མཁྲིས་སྦྱར་བ་བསྔགས། །གླ་རྩི་དུག་ཉུང་བཙོད་དང་ལི་ག་དུར། །དོམ་མཁྲིས་བོང་དཀར་སྐྱེར་པའི་བར་ཤུན་སྦྱར། །ཁྱད་པར་གཉན་ཤས་ཆེ་ན་བསད་རྗེས་སྦྱང༌། །ཕག་རིལ་སྲད་དཀར་ཧོང་ལེན་དེ་བ་བཞི། །ཁྱོར་བ་རེ་རེ་སོ་སོར་བསྲེགས་ཐལ་བ། །དམར་ཟལ་བ་ཆུས་འདམ་བཏགས་བྱས་པའི་ཕྱེ། །ཀ་རས་ཁ་གླན་རིམས་ཚད་ཀུན་ལ་བསྔགས། །ཁྱད་པར་འདུས་རིམས་རིམས་སྨྱོན་ཏྲེ་ཏྲེ་ཧོ། །གཉན་རིམས་ཕོ་བར་བབས་པའི་བདུད་རྩི་ཡིན། །མཁྲིས་ཡུལ་རླུང་གིས་ཕྲོགས་ལ་ཁ་རུ་ཚྭ། །ཛཱ་ཏི་ཐང་དང་བུར་ཆུང་བསྡེབས་ལ་བཏང༌། །ག་བུར་ནག་པོ་ཆང་དུ་སྦྱར་བ་བསྔགས། །མ་ཞུས་རྒྱུ་བྱས་སྒྲེག་སྐྱུག་ཟས་མི་འཇུ། །རྒྱམ་ཚྭ་བཞི་ཐང་བཏང་ཞིང་(ཨ་རུ་ལྕུམ་རྩ་པི་ལིང་གསེར་མེའི་)ཐང་བཤལ་བྱ། །རྒྱུ་མར་བབས་ན་དང་པོ་བཤལ་བཏང་ལ། །དེ་རྗེས་གཉེན་པོ་ཐོག་རུས་རྒུ་དྲུས་དང༌། །གླ་རྩི་ཆོས་སྨན་བོང་ང་དཀར་པོ་དང་། །ཆུ་རྩ་དྲི་ཆུར་སྦྱར་ལ་བཏང་བར་བྱ། །རིམས་ཚད་དང་པོ་མ་སྨིན་སྙན་གསན་འབེབས། །བར་དུ་ཚ་བ་སྨིན་རྒྱས་གཞི་ལ་གནོན། །ཐ་མར་གཞུག་རྒྱན་ཐོར་བུའི་ཞབས་ཏོག་བྱེད། །དེ་ཕྱིར་ཐོར་བུ་ནད་ཀྱི་བསལ་ཐབས་གཅེས། །རིགས་པས་ཚ་བ་སྤྱི་དང་འཕྲུལ་ཏེ་བཅོས། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རིམས་ཀྱི་ཚ་བ་བལ་ནད་བཅོས་པའི་ལེའུ་སྟེ་ཉི་ཤུ་རྩ་གསུམ་པའོ།། །།



 

མཐའ་མའི་འདོན་ཐེངས་།: 20.12.2022 ཉིན། 3:47 PM