ལེའུ་ང་བརྒྱད་པ། གྲུམ་བུའི་ནད་བཅོས་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །གྲུམ་བུའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

རྒྱུ་རྐྱེན་རླན་སྣུམ་ཡུལ་དང་སྣུམ་བཅུད་ཟས། །དྭངས་མ་གནས་སུ་མ་སྨིན་ཆུ་སེར་རྒྱས། །ཤ་རུས་རྩ་རྒྱུས་ལ་གནས་གྲུམ་བུ་སྐྱེད།།

དབྱེ་བ་ཤ་ཏྲེམ་རུས་ཏྲེམ་རྩ་ཏྲེམ་དང༌། །ཆུ་ཏྲེམ་ཏྲེམ་དཀར་ཏྲེམ་ནག་རྣམ་པ་དྲུག།

དེ་ཡི་རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་གྲང་ཤུམ་ཡུན་རིང་ཤ་ལྤགས་བརྩེ། །གདོང་སྣུམ་མགོ་བོ་རྐེད་པ་དཔྱི་མིག་ཟུག །ཤེད་ཆུང་སྒྱིད་སྐྱུར་ཤ་འབྲོས་རྔུལ་ཁ་སྙི། །རུས་ཚིགས་ཤ་རུས་འཁོལ་ཞིང་ཆུ་རྒྱུས་གྱོང༌། །འགུལ་ཚེ་ལྷག་པར་ན་ཞིང་སྐད་ངན་འཆོར། །ཆུ་དམར་རྩ་འཁྱུག་ཕྲ་མགྱོགས་གཏིང་ན་རྒྱུག །བྱེ་བྲག་ཤ་ཏྲེམ་བད་མཁྲིས་ཤས་ཆེ་སྟེ། །ཤ་སྦོ་མདོག་ནག་ཡན་ལག་སྦྲིད་པ་དང༌། །གློ་སྙིང་མི་བདེ་སྣ་ཁྲག་མང་དུ་འཛག །ཤ་རུས་འབྱེད་སྙམ་བེམ་པོར་བྱེད་པ་ཡིན། །རུས་ཏྲེམ་རླུང་གི་ཤས་ཆེ་སྐོམ་དད་ཆེ། །རུས་པ་ཚ་བ་སྐྱེ་ཞིང་འཇུ་ལ་སྐམ། །ཚིགས་རྣམས་གྲམ་ཞིང་ཟུག་ཆེ་འགུལ་མི་ནུས། །བསྒུལ་དང་སྒྲ་ཆེར་མི་བཟོད་གཡང་སྐྱུར་སེམས། །རྩ་ཏྲེམ་ཁྲག་གི་ཤས་ཆེ་བཀྲག་མདངས་ཉམས། །གློ་སྙིང་མི་བདེ་ལྟག་ཤ་ཆད་སྙམ་བྱེད། །རྩ་རྣམས་སྦོས་ཤིང་སྲ་ལ་ན་བ་ཡིན། །ཆུ་ཏྲེམ་ཆུ་རྒྱུས་གྱོང་འདར་རེངས་འཁུམས་སྐམས། །ཏྲེམ་དཀར་ཆུ་སེར་དཀར་པོ་གྲང་ཤས་ཆེ། །ཏྲེམ་ནག་ཆུ་སེར་ནག་པོ་ཚ་ཤས་ཆེ།།

བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་དང་པོ་ཞག་ལྔའི་བར་དག་ཏུ། །བད་ཀན་ཆུ་སེར་སྦྱང་ཕྱིར་འབྲས་བུ་གསུམ། །སླེ་ཏྲེས་ཐང་བསྟེན་ཆུ་བསྐོལ་ཡང་ཡང་བཏུང༌། །དེ་རྗེས་ཙན་དན་དཀར་དམར་གི་ཝཾ་དང༌། །བཟང་དྲུག་ཆུ་སེར་སྨན་གསུམ་གེ་སར་གཉིས། །ཏིག་ཏ་སླེ་ཏྲེས་སྤྱི་ཞུར་འབྲས་བུ་གསུམ། །གླ་རྩི་སྤང་རྒྱན་བེ་དོ་བ་ཤ་ཀ །བོང་ཁྲག་ཀ་ར་སྦྱར་བ་ཉི་ཤུ་ལྔ། །དགུང་གཉིས་སེང་ལྡེང་ཁུ་བས་འཕུལ་ལ་བཏང༌། །སེ་འབྲུ་ལྔ་པ་ནང་ནུབ་ཆུ་སྐོལ་བཏུང༌། །དྭངས་མ་གནས་འཇོག་ཆུ་སེར་ཚ་བ་སྐེམ། །གླ་རྩི་གུར་ཀུམ་སྒ་རྒོད་གཉེན་པོའི་སྨན། །ཞོའམ་བོང་ཁྲག་ལ་སྦྱར་ལྡེ་གུར་བཏང། །སྨན་རྗེས་འབྲས་བུ་གསུམ་གྱི་རྒྱུན་སྦྱོངས་བྱ། །ཤ་སྦོས་ཆུ་བ་འཁུམས་སམ་རུས་ཚིགས་ཟུག །ར་མཉེ་བ་སྤྲུ་ཉེ་ཤིང་ཆུ་ལུམས་བྱ། །རྗེས་ལ་སྤང་སྤོས་མར་དཀར་སྦྱར་བ་བྱུག །ཚིགས་མིག་ཆུ་སེར་གྲང་ཐུར་སྦྱོར་བས་འདོན། །ཁ་ཟས་འབྲས་དང་ཆག་ཚེ་སྲན་ཆན་དང༌། །ཁུར་མང་བ་ཡི་ཞོ་དར་བསྐོལ་གྲང་ཆུ། །ཇ་སོགས་བསིལ་ལ་ཡང་བའི་ཟས་སྐོམ་བསྟེན། །རུལ་སྐྱུར་སྣུམ་ལྕི་ཚྭ་སོགས་དུག་འདྲ་སྤང༌། །མེ་ཉི་ཉིན་གཉིད་རླན་གྲང་ཀུན་ལ་གཟབ། །ཚ་བ་བྱང་བའི་རྟགས་བྱུང་སྦྲང་ཆང་དང༌། །བ་ཡི་རྣམ་ལྔས་ཆུ་སེར་ཚད་ལྷག་སྐམ། །སྐམ་སར་མི་རྔུལ་ཙམ་དུ་དལ་བར་བཅག །བྱེ་བྲག་ཤ་ཏྲེམ་གཟེ་མ་བ་སྤྲུ་བ། །ཤིང་ཚ་དོང་གྲ་མར་སྦྱར་ལྡེ་གུ་བཏང་། །ལྕ་བའི་ཁཎྜ་གཡེར་ཆུ་སྒ་ཆུ་བསྟེན། །རུས་ཏྲེམ་ག་བུར་བཟང་དྲུག་ཙན་དན་དཀར། །ཤིང་ཚ་བ་ལེ་ཀ་དང་པུ་ཤེལ་རྩེ། །བཅའ་སྒ་ནག་མཚུར་ཀ་ར་སྦྱར་ལ་བཏང༌། །བོང་ཁྲག་དྲོན་མོ་གླ་རྩི་སྒ་སྦྱར་རམ༌།  །བུ་རམ་སྦྲང་རྩི་མར་སྦྱར་ཏིང་ཁྲོལ་བཏང༌། །གཏར་བསྲེག་མི་བྱ་རྗེས་ལ་བཤུལ་ཤ་བསྟེན། །རྩ་ཏྲེམ་དང་པོ་བ་ལེ་ཀ་ཡི་ཐང༌། །དེ་འོག་གཡེར་ཆུ་བསྡུས་ཐང་བཏང་བར་བྱ། །རུ་རྟ་སེ་འབྲུ་ཤིང་ཚ་པི་པི་ལིང༌། །སྒ་སྐྱ་ཨ་རུ་ར་དང་ཁ་རུ་ཚྭ། །སྦྲང་དང་སྦྱར་བའི་ལྡེ་གུ་བཏང་བར་བྱ། །གླ་རྩི་གུར་ཀུམ་ཨ་རུ་ལི་དོང་གྲ། །སྦྲང་རྩི་མར་དང་སྦྱར་བའི་ལྡེ་གུ་བཏང༌། །རྩ་ཡི་དྲོད་འཆོར་གཏར་ག་མི་བྱ་སྤང༌། །ཆུ་ཏྲེམ་འབྲས་བུ་གསུམ་དང་མཱུ་ལ་གསུམ། །འུ་སུ་ཚ་བ་གསུམ་དང་ཚྭ་སྣ་གསུམ། །སྦྲང་རྩི་མར་དང་སྦྱར་བའི་ལྡེ་གུ་བཏང༌། །ཨ་རུ་རྒུན་འབྲུམ་འུ་སུ་ཤུ་མོ་ཟ། །ཚ་བ་ལྔ་དང་སྦྲང་རྩི་མར་སྦྱར་བཏང༌། །བྱིན་གཞུག་རྩ་གཏར་ཚ་བ་བྱང་བ་དང༌། །བཅོ་ལྔ་བཅུ་དྲུག་དཔྱི་མིག་གར་བབས་བསྲེག །ཆུ་རྒྱུས་འཁུམས་ན་བསྐུ་མཉེ་དྲག་ཏུ་བྱ། །ཏྲེམ་དཀར་ཆང་ནང་ཤིང་ཚ་ལི་དོང་གྲ། །སྦྲང་སྦྱར་རྩ་བའི་ཟན་ཆང་ཆུ་ལུམས་བྱ། །ར་མཉེ་བ་སྤྲུ་ཉེ་ཤིང་སྦྲང་མར་བསྟེན། །ཏྲེམ་ནག་ཨ་རུ་ཆུར་བསྡུས་ཞག་འགར་བཏང༌། །གུར་ཀུམ་བཤལ་བྱ་གཟེ་མའི་སྨན་མར་སྦྱར། །ཀུན་ལ་སྐྱེད་ཆུང་རུས་རྩ་གཏར་བ་དང༌། །གཟེབ་ཏུ་བཅུག་ལ་ཁ་བཅིང་ལན་མང་སྒྲིལ། །རྟ་ལ་བསྐྱོན་ཏེ་གསང་ལ་ཆུ་ནང་སྐྱུར། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གྲུམ་བུའི་ནད་བཅོས་པའི་ལེའུ་སྟེ་ལྔ་བཅུ་རྩ་བརྒྱད་པའོ།། །།

མཐའ་མའི་འདོན་ཐེངས་།: 21.12.2022 ཉིན། 9:33 AM