ལེའུ་ང་གཅིག་པ། སྐྱུགས་པའི་ནད་བཅོས་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །སྐྱུགས་ཀྱི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

རྒྱུ་རྐྱེན་མ་ཞུ་ལྷེན་དང་ལྕགས་དྲེག་དང༌། །ཁོང་འབྲས་བད་སྨུག་སྲིན་བུ་སྟེང་རླུང་འཁྲུགས། །མི་སྡུག་ཡུལ་མཐོང་རྣམས་ཀྱིས་གྱེན་དུ་སྐྱུག།

དབྱེ་བ་རླུང་མཁྲིས་བད་ཀན་འདུས་པ་བཞི།།
དེ་རྟགས་མ་ཞུ་གང་ཟོས་དེ་ཉིད་སྐྱུག །ལྷེན་དང་ལྕགས་དྲེག་ཆུ་སྐྱུར་བད་ཀན་སྐྱུག །ཁོང་འབྲས་ཁ་ཟས་ཀུན་ལ་འཁྲེན་པ་སྟེ། །བད་ཀན་སྨུག་པོ་རྒྱ་བཤལ་དུད་ཁུ་སྐྱུག །སྲིན་གྱིས་སྲིན་སྐྱུག་རླུང་འཁྲུག་སྟོང་སྐྱུགས་བྱེད། །མི་སྡུག་ཡུལ་མཐོང་དྲི་ཚོར་རེག་པས་སྐྱུག །རླུང་གྱུར་ལྦུ་ཅན་ཆུ་ཐབས་སྐྱུག་པ་ལ། །བྲང་རྒྱབ་རྩིབ་ལོགས་གཟེར་ཞིང་མགོ་བོ་འཁོར། །མཁྲིས་གྱུར་ཁ་ཁ་སེར་པོ་ཁྲག་ཅན་སྐྱུག །ལུས་ཚ་སྐོམ་དད་ཆེ་ལ་མགོ་བོ་གཟེར། །བད་ཀན་ལས་གྱུར་བེ་སྣབས་བསྐ་མངར་སྐྱུག །དང་ག་འགག་ཅིང་གདོང་སྐྲངས་བྲང་ཁ་ན། །འདུས་པ་ལས་ནི་ཀུན་རྟགས་སྟོན་པར་བྱེད།།

བཅོས་ཐབས་ཀུན་ལ་སྨྱུང་བྱ་ཆུ་ཚན་བཏུང༌། །ཟས་སྐོམ་ཡང་ལ་འཇུ་སླ་ཅུང་ཟད་བསྟེན། །ཟས་ཟོས་རྗེས་ལ་ཆུ་གྲང་གདོང་བཀྲུ་གཏོར། །ཁྱད་པར་མ་ཞུ་རྒྱམ་ཚྭ་གསུམ་པས་བཞུ། །ལྷེན་དང་ལྕགས་དྲེག་ཐལ་སྨན་རྗེས་ལ་རློན། །ཁོང་འབྲས་ཚེར་སྔོན་སྔོ་ཡི་ཚ་བ་གསུམ། །ཐར་ནུ་བསྲེགས་ཐལ་རྒྱ་ཚྭ་སེར་མཚུར་སྦྱར། །རྒྱ་བཤལ་དུད་ཁུ་སྐྱུག་ལ་སྨུག་པོ་བཞིན། །སྟེང་རླུང་འཁྲུགས་ལ་མེ་བཙའ་རུས་ཐང་བཏང༌། །སྲིན་ལ་དེ་སྨན་མི་སྡུག་ཡིད་འོང་བཟློག །རླུང་གྱུར་ཚ་བ་གསུམ་དང་ཚྭ་སྣ་གསུམ། །ཞུན་མར་སྦྱར་བཏང་བྱུག་བྱས་མེ་བཙའ་བྱ། །མཁྲིས་གྱུར་སྦྱངས་རྗེས་འབྲས་ཀྱི་སྦྱོར་བས་བཅད། །བད་ཀན་སྐྱུགས་རྗེས་བྱི་ཚེར་སྦྲང་སྦྱར་རམ། །སེ་འབྲུ་འབྲས་ཡོས་ནས་ཕྱེ་སྦྱར་བ་བྱིན། །འདུས་པའི་ནད་ལ་གསུམ་དང་བཅོས་པར་བྱ། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐྱུགས་པའི་ནད་བཅོས་པའི་ལེའུ་སྟེ་ལྔ་བཅུ་རྩ་གཅིག་པའོ།། །།

མཐའ་མའི་འདོན་ཐེངས་།: 21.12.2022 ཉིན། 9:22 AM