སྨན་རྩིས་དྲ་བ། - བཤད་རྒྱུད།

ལེའུ་གསུམ་པ། ལུས་ཀྱི་འདྲ་དཔེ་བསྟན་པ།

བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 09.02.2011
བཤད་རྒྱུད། >> ལེའུ་གསུམ་པ། ལུས་ཀྱི་འདྲ་དཔེ་བསྟན་པ།



ལེའུ་གསུམ་པ། ལུས་ཀྱི་འདྲ་དཔེ་བསྟན་པ། 

ལུས་ཀྱི་ཆགས་ཚུལ་རྒྱས་པར་གསུངས་ཟིན་པའི་རྗེས་ཐོག་དེ་མ་ཐག་དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་ལུས་ཀྱི་འདྲ་དཔེ་རྣམས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས་ཞེས་བོས་ནས། །ད་དུང་ལེགས་པར་ཉོན་ལ་ཡིད་ལ་ཟུངས་ཤིག་དང༌། འགྲོ་བ་མིའི་ལུས་ཇི་ལྟར་ཆགས་པ་དེ་རྣམས་ཀྱང་ཚུལ་གང་དང་འདྲ་བ་མི་ཤེས་པ་རྣམས་ཀྱི་སླད་དུ་འདྲ་བའི་དཔེ་དང་སྦྱར་ཏེ་ཕུང་པོའི་ཆ་ཤས་རྣམས་ཀྱི་གནས་ལུགས་འདི་ལྟར་བསྟན་པར་བྱའོ།།

དེ་ཡང་མིའི་ལུས་འདི་ཉིད་ཙོག་ཙོག་པུར་ལག་པ་དཔྱངས་ཏེ་བསྡད་པ་ནི་འཁོར་ལོས་སྒྱུར་བའི་རྒྱལ་པོའི་ཕོ་བྲང་གི་ཚུལ་དུ་གསུངས་པ་ལས། དཔྱིའི་རུས་པ་གཡས་གཡོན་གཉིས་པོ་ནི་རུས་པའི་ནང་ནས་ཆེ་ཞིང་རྩ་བར་གནས་པའི་དོན་གྱིས་རྩིག་པའི་འགྲམ་གཞི་དང་ཚུལ་འདྲའོ། །སྒལ་ཚིགས་ཉེར་གཅིག་གམ་ཉེར་བརྒྱད་ནི་དཀོར་མཛོད་དུ་གསེར་གྱི་དོང་ཙེ་བརྩེགས་ནས་བཞག་པ་དང་འདྲའོ། །སྲོག་རྩ་ནག་པོ་ནི་མཆོང་གི་ཀ་བ་དང་འདྲ་ལ། བྲང་གི་རུས་པ་གྲུ་བཞི་ནི་གདུང་མ་བཀལ་བ་དང་འདྲའོ། །དེའི་སྟེང་དུ་རྩིབ་མ་ཉེར་བཞི་ནི་ཕྱམ་འགྲེམས་ལེགས་པ་དང་འདྲ་ལ། ལྷ་རུ་རྩེ་ནི་ཕྱམ་གྱི་རྟེན་མ་འདྲའོ།། རྩ་དང་ཆུ་རྒྱུས་རྣམས་ནི་དྲལ་མ་ཕྱམ་གྱི་སྟེང་དུ་བཀོད་པ་དང་འདྲ་ལ། ཤ་དང་པགས་པ་རྣམས་ནི་ཕྱི་ནང་གཉིས་ཀར་འདག་པའི་ཞལ་བ་བྱས་པ་དང་འདྲའོ། །སྒྲོག་རུས་གཉིས་ནི་མཁར་རམ་སྤེའུ་ལ་བད་བཏགས་པ་དང་འདྲའོ། །སོག་པ་གཉིས་ནི་གྲུ་ཕུབས་བྱས་པ་ཞེས་ཁང་པའི་ནང་ཟུར་དང་འདྲའོ། །མགོ་བོ་ནི་དབུ་རྩེ་བ་གམ་བྱས་པ་དང་འདྲ་ལ། མིག་ལ་སོགས་པའི་དབང་པོ་སྒོ་ལྔ་པོ་ནི་སྐར་ཁུང་གློ་དཀར་བཏོད་པ་དང་འདྲའོ། །ཐོད་པའི་རུས་པ་ནི་ཡང་ཐོག་ཏུ་རྒྱ་ཕུབས་བཀལ་བ་དང་འདྲ་ལ། ཚངས་པའི་བུ་ག་ནི་དུད་ཁུང་ཕྱེ་བ་དང་འདྲའོ། །རྣ་བ་གཡས་གཡོན་ནི་ཁྱུང་མགོ་འགྱིང་བ་དང་འདྲ་ལ། དེའི་དབུས་སུ་སྣ་བུག་ནི་མཛེས་པའི་རྒྱན་ཏེ་རྒྱ་ཕུབས་ཀྱི་ཏོག་དང་འདྲའོ། །སྐྲའི་ལོ་མ་རྣམས་ནི་ཕོ་གྱོ་མོ་གྱོའི་རྫ་བསྒྲིགས་པ་དང་འདྲ་ལ། ལག་པ་གཉིས་ནི་ཁང་པའི་ཕྱི་ལ་དར་དཔྱངས་བཏགས་པ་དང་འདྲའོ། །བྱང་ཁོག་སྟོད་སྨད་ནི་ཁྱམས་སྟོད་ཁྱམས་སྨད་འདྲའོ། །དེའི་བར་མཆིན་དྲི་ནི་དར་གྱི་ཡོལ་བ་བཀྲམ་པ་དང་འདྲ་འོ། །དེ་ལ་ཁྱམས་སྟོད་དུ་སྙིང་ནི་རྒྱལ་པོ་གདན་ལ་བཞུགས་པ་དང་འདྲ་ལ། གློ་བ་མ་ལྔ་ནི་རྒྱལ་པོ་དེའི་ནང་གི་བློན་པོ་དང་འདྲའོ། །གློ་བ་བུ་ལྔ་ནི་རྒྱལ་པོའི་སྲས་ཕོ་མོ་དང་འདྲ་སྟེ་ཤིན་ཏུ་བཀའ་གཉན་ལ། ཁྱམས་སྨད་དུ་མཆིན་པ་དང་མཆེར་པ་གཉིས་ནི་བཙུན་མོ་ཆེན་མ་ཆུན་མ་དང་འདྲའོ། །མཁལ་མ་གཉིས་པོ་ཕྱིའི་བློན་པོའམ་ཡང་ན་གྱད་པས་གདུང་མ་འདེགས་པ་དང་འདྲའོ། །བསམ་སེའུ་ནི་ནོར་གྱི་མཆོག་རིན་པོ་ཆེས་བཀང་བའི་བང་མཛོད་དང་འདྲའོ། །ཕོ་བ་ནི་ཁ་ཟས་གཡོས་བཅུ་བྱེད་པའི་ཁོག་མ་དང་འདྲ་ལ། རྒྱུ་མ་དང་ལོང་ག་གཉིས་ནི་བཙུན་མོའི་ཡང་གཡོག་དང་འདྲ། མཁྲིས་པ་ནི་སྡོར་གྱི་རྐྱལ་པ་བཀལ་པ་དང་འདྲ་ལ། ལྒང་ཕུག་ནི་ཆུའི་རྫ་མ་བཀང་བ་དང་འདྲའོ། །འོག་སྒོ་གཉིས་ནི་ཆུ་ཁུང་བཞག་པ་དང་འདྲ་ལ། རྐང་པ་གཉིས་ནི་སྒོའི་རྟ་བབས་དང་འདྲའོ། །ཕྱི་ནང་གི་གཉན་པའི་གནད་རྣམས་ནི་རྒྱལ་པོས་མངའ་བཀུར་བའི་ཕོ་ཉ་བ་མང་པོ་དང་འདྲ་སྟེ། ཕོ་ཉ་བ་དང་འདྲ་བའི་གནད་རྣམས་མ་བདེ་ན་རྒྱལ་པོ་དང་མཚུངས་པའི་སྙིང་ཡང་འཁྲུགས་ཏེ་ལུས་དང་སྲོག་འབྲལ་བར་འགྱུར་རོ་ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་ལུས་ཀྱི་འདྲ་དཔེ་བསྟན་པའི་ལེའུ་སྟེ་གསུམ་པའོ།། །།


 

མཐའ་མའི་འདོན་ཐེངས་།: 05.09.2023 ཉིན། 9:44 AM

<< སྔ་མ།

ནང་གསེས་དཀར་ཆག

ཡིག་ཆ་གསར་ཤོས།

ཐོན་ཟོག་ཁྲལ་འབབ་སྡེ་ཚན་གྱིས་ཆེ་བསྟོད་གནང་།

བོད་ཡིག་མིང་བྱང་ལ་འགྱུར་བཅོས་བཏང་བ།

ཅོན་ཏ་ར་སྨན་སྦྱོར་སྡེ་ཚན་དུ་ཆོད་གན་ལས་མི་དྲུག་གི་ས་མིག་གསལ་བསྒྲགས།

བརྟན་བཞུགས་སྔོན་འགྲོའི་རིམ་གྲོར་སྲོག་ཆགས་ཚེ་ཐར་བཏང་བ།

འགྲོ་ཕན་སྨན་རྩིས་ཁང་གི་མིང་དུ་བརྫུས་ཏེ་ནད་པ་བསླུ་བྲིད་བྱེད་པའི་གནས་ཚུལ།

ཁ་ལོ་བ་གཅིག་དང་ཆོད་གན་ལས་མི་དྲུག་གི་ས་མིག་གསལ་བསྒྲགས།

ཆོད་གན་ལས་མི་སྐྱེས་པ་གཉིས་དང་བུད་མེད་གསུམ་གྱི་ས་མིག་གསལ་བསྒྲགས།

ལེའུ་དང་པོ། ཀླད་དོན་གླེང་སློང་བ།

ལེའུ་གཉིས་པ། རླུང་ནད་གསོ་བ།

ལེའུ་གསུམ་པ། མཁྲིས་པའི་ནད་གསོ་པ།

ལེའུ་བཞི་པ། བད་ཀན་གྱི་ནད་བཅོས་པ།

ལེའུ་ལྔ་པ། འདུས་པའི་ནད་གསོ་བ།

ལེའུ་དྲུག་པ། མ་ཞུ་བ་གསོ་བ།

ལེའུ་བདུན་པ། གཅོང་ཆེན་སྐྲན་ནད་བཅོས་པ།

ལེའུ་བརྒྱད་པ། སྐྱ་རྦབ་ཀྱི་ནད་གསོ་བ།