རིགས་ལམ་ངོ་སྤྲོད་སོགས་ཀྱི་འཆད་ཁྲིད་མུ་མཐུད་གནང་རྒྱུ།
 

དྷ་ས་ནང་ཆོས་ངོ་སྤྲོད་ཚོགས་པའི་སློབ་དཔོན་རིས་མེད་པ་དགེ་བཤེས་བློ་བཟང་ཟླ་བ་མཆོག་གིས་སྔ་ལོ་ཟླ་ ༩ ནས་བཟུང་འདི་ག་སྨན་རྩིས་སློབ་མ་རྣམས་གཙོ་བའི་སྨན་རྩིས་ལས་བྱེད་དང་ཕྱི་མི་དོན་གཉེར་ཅན་རྣམས་ལ་ནང་དོན་རིག་པ་ནས་གསུངས་པའི་སེམས་ཁམས་འཕྲོད་བསྟེན་དང་བློ་རིག་རྣམ་གཞག་སོགས་ཀྱི་སྐོར་སློབ་ཁྲིད་གནང་ཡོད། སྐབས་མཚམས་ལོ་མཇུག་ཏུ་སྨན་རྩིས་སློབ་གཉེར་བ་རྣམས་ཀྱི་ལོ་འཁོར་ཡིག་རྒྱུགས་དང་དགུན་ཁའི་གུང་སེང་འཁེལ་ཀྱི་ཡོད་སྟབས་བར་མཚམས་བཞག་དགོས་བྱུང་ཡོད། ད་ཆ་སླར་ཡང་འཆད་ཁྲིད་དབུ་འཛུགས་ཞུ་རྒྱུ་རེད།
 

འདི་ལོའི་ཟླ་ ༤  ཚེས་ ༤ ནས་འགོ་ཚུགས་ཏེ་བདུན་རེའི་རེས་གཟའ་མིག་དམར་དང་ཕུར་བུ་འཆར་ཅན་ལ་སྨན་རྩིས་མཐོ་སློབ་ཚོགས་ཁང་ཆེན་མོའི་ནང་དུ་ཕྱི་དྲོ་ཕྱག་ཚོད་ ༤ ནས་ ༦ བར་སློབ་ཁྲིད་དང་བགྲོ་གླེང་བཅས་གནང་རྒྱུ་རེད། འདི་ནི་གཙོ་བོ་དབུས་འཛིན་སྐྱོང་ནས་ྋསྤྱི་ནོར་ྋགོང་ས་སྐྱབས་མགོན་ཆེན་པོའི་བཀའ་དགོངས་ལམ་སྟོན་གཞི་བཟུང་ནང་དོན་རིག་པའི་ཤེས་ཚད་གོང་འཕེལ་གཏོང་རྒྱུར་དམིགས་ནས་གོ་སྒྲིག་ཞུས་པ་ཞིག་ཡིན་ལ་སྨན་རྩིས་མཐོ་སློབ་ཀྱི་སློབ་གཉེར་བ་གཙོ་བོར་གྱུར་པའི་དོན་གཉེར་ཡོད་པའི་སྨན་རྩིས་ལས་བྱེད་པ་རྣམས་དང་། གཞན་ཡང་བོད་མིའི་སྒྲིག་འཛུགས་ཁྱབ་ཁོངས་ཀྱི་སྲི་ཞུ་ལས་བྱེད་རྣམ་པ་དང་། མང་ཚོགས་བཅར་འདོད་ཡོད་པ་སུ་རུང་ཕེབས་འཐུས་ཆོག་པ་ཡིན།
 

དེ་ཡང་སློབ་ཁྲིད་རྩ་འཛིན་ཡིག་ཆ་ཁག་ནི་དགེ་བཤེས་བློ་བཟང་ཟླ་བ་ལགས་ཀྱིས་མཛད་པའི་《དཔལ་ནྰ་ལྣྡྲའི་མཁས་པའི་གཞུང་ནས་གསུངས་པའི་རིགས་ལམ་ངོ་སྤྲོད་བློ་གསར་འཇུག་ངོགས་》ཞེས་པ་དེ་དང་། ལྷན་ཐབས་སུ་《རྟགས་རིག་གི་རྣམ་གཞག་ལ་དཔྱོད་པ་དོགས་སློང་གསལ་བའི་མེ་ལོང་།》  《བློ་གསར་ལ་ཉེ་བར་མཁོ་བ་བསྡུས་གྲྭའི་རྣམ་གཞག་རིགས་ལམ་མིག་འབྱེད།》ཅེས་གཞུང་གཉིས་དང་། 《ནང་པའི་ཚན་རིག་དང་ལྟ་གྲུབ་ཀུན་བཏུས། པོད་ལྔ་པ།》 བཅས་ཡིན།

རྒྱུ་རྐྱེན་གང་ཞིག་གིས་འཆད་ཁྲིད་ལ་དངོས་སུ་བཅར་མ་ཐུབ་པ་དང་དྷ་སའི་ཕྱི་རོལ་ཏུ་གཏོགས་པའི་དོན་གཉེར་བ་རྣམས་ཀྱི་སླད་དུ་འདི་ནས་སྔ་ལོའི་འཆད་ཁྲིད་གནང་བ་རྣམས་དང་། འབྱུང་འགྱུར་གྱི་སློབ་ཁྲིད་ཚོགས་ཐེངས་ཚང་མའི་སྒྲ་རྐྱང་པ་འདིར་ཉར་ཚགས་གནང་ཡོད་ན་གཤམ་གྱི་སྦྲེལ་ཐག་ལ་ནོན་ནས་ཡང་ཡང་གསན་བཞེས་གནང་བ་ཞུ།

འདིར་ནོན། རིགས་ལམ་ངོ་སྤྲོད་སོགས་འཆད་ཁྲིད་གནང་བ་རྣམས་གསན།

མཐའ་མའི་འདོན་ཐེངས་།: 03.04.2017 ཉིན། 12:45 PM