དུས་གཟེར་ཉེར་བཞི་ལས་འཕྲོས་ཏེ་འབྱུང་རྩིས་ཀྱི་ལོ་འགོ་འཛིན་ཚུལ་ལ་
ཅུང་ཙམ་དཔྱད་པ་བྱིས་པ་གཞོན་ནུའི་གོམ་འགྲོས།

ཨ་མདོ་ལེགས་བཤད།

           
དེ་ལ་འདིར་གླེང་བར་བྱ་བ་ནི། རང་ཅག་ཁ་བ་རི་པའི་བཅུ་ཕྲག་རིག་པའི་གནས་ཀྱི་ཡ་གྱལ། གཙུག་ལག་རྩིས་ཀྱི་གཞུང་ལུགས་ལས་འབྱུང་རྩིས་ཀྱི་ལོ་འགོ་འཛིན་ཚུལ་སྐོར་ལ་ཅུང་ཙམ་དཔྱད་པ་དེ་ཡིན་ལ། དེ་ཡང་ལོ་འགོ་ཞེས་པ་ཟླ་བ་བཅུ་གཉིས་ཀྱི་དང་བོའམ་དུས་ཀྱི་ཐོག་མ་ལ་གོ་དགོས་པ་ནི། འབྱུང་བ་ཁོང་ཁྲོད་ལེའུ་ལས། ལོ་ཟླ་བས་འཕོ། ཟླ་བ་ཚེས་གྲངས་ཀྱིས་འཕོ། ཚེས་གྲངས་དུས་ཚོད་ཀྱིས་འཕོ། དཔྱིད་ཟླ་ར་བའི་ཚེས་གཅིག་གི་ནམ་ལངས་ནས་ལོ་གསར་བར་རྩིས་ཤིག་ཅེས་གསུངས་ཡོད་པས། ཐོག་མར་དུས་ཚིགས་བཞི་ངོས་ཟིན་རྒྱུ་ནི་སྔོན་འགྲོའི་ཆ་རྐྱེན་བླ་ན་མེད་པ་ཞིག་ཡིན་པ་དང་། དེ་ངོས་འཛིན་པ་ལ་ཡང་དུས་གཟེར་ཉེར་བཞིའམ་དབུགས་སྒང་ཉེར་བཞི་ནི་ངེས་པར་དུ་ངོས་ཟིན་དགོས། རྒྱུ་མཚན་ནི་ནམ་མཁའི་གཟའ་སྐར་གྱི་འགྲོས་དང་བསྟུན་ནས་ས་ལ་དུས་བཞི་འབྱུང་བ་དང་། དུས་གཟེར་ཉེར་བཞིས་དེ་དག་གི་ཚུལ་དང་། ལོ་གཅིག་གི་རིང་ཉི་མ་གར་གནས་སོགས་སྟོན་པར་བྱེད་ལ། དེའི་རྐྱེན་གྱིས་ས་ལ་དུས་བཞིའི་འགྱུར་བའང་འཆོལ་མེད་དུ་སྟོན་པས་ན། དུས་བཞི་མི་འགྱུར་གནད་ཀྱི་གཟེར་ཞེས་བྱའོ། །དེས་ན་དུས་གཟེར་ཉེར་བཞི་ལས་དུས་ཚིགས་བཞི་ངོས་འཛིན་དགོས་པའང་ཤེས་པར་བྱའོ། །སྤྱིར་དུས་གཟེར་ཉེར་བཞིའམ་དབུགས་སྒང་ཉེར་བཞི་ཞེས་པའི་དབུགས་དང་སྒང་ནི་ཟླ་བའི་འགོ་ཚུགས་པ་དང་། དཀྱིལ་ལ་སླེབས་པའི་དུས་རྟགས་ཤིག་ལ་གོ་དགོས་ཤིང་། རྒྱ་ནག་སྐད་དུ་དབུགས་ལ་ཅེ་ཆིས་དང་། སྒང་ལ་ཀྲུང་ཆིས་ཟེར་ཞིང་། ཅེ་ནི་ལྷུ་ཚིགས་ཀྱི་ཚིགས་དང་། ཀྲུང་ནི་དབུས་སམ་དཀྱིལ་ཡིན་ལ། ཆིས་ཞེས་པ་གནམ་དྭངས་འཐིབ་དང་དྲོ་འཁྱག་སོགས་གནམ་གཤིས་དང་། དཔྱིད་དབྱར་དགུན་སོགས་ནམ་ཟླ་སྟོན་པས་རང་རེའི་ལོ་ཙཱ་བ་སྔ་མ་ཚོས་དབུགས་སུ་བསྒྱུར་བ་འདིས་ཀྱང་སྐབས་འདིར་གནམ་གཤིས་དང་ནམ་ཟླ་གཉིས་ཀ་ལ་གོ་དགོས་སོ། །ཞེས་<<རྒྱ་རྩིས་གོ་དོ་>>ལས་གསུངས་སོ། །དེས་ན་ཐོག་མར་དུས་གཟེར་ཉེར་བཞི་ངོས་ཟིན་ཚེ་བཤད་བདེ་བས་དེ་དག་རྒྱ་སྐད་དང་བོད་སྐད་ཤན་སྦྱར་ཏེ་ངོས་འཛིན་པར་བྱའོ།།

            དེ་དག་ངོས་ཟིན་པ་ལས་སྟོན་དཔྱིད་ཉིན་མཚན་མཉམ་པ་དང་། དབྱར་དགུན་ལྡོག་གཉིས་སོགས་དུས་ཚིགས་བཞི་ངང་གིས་རྟོགས་པ་ཡིན་ནོ། །དེ་དག་ནི་གཟའ་ཉི་དག་སྐར་ཁྱིམ་ལ་སྤྱོད་པའི་འབྲས་བུ་ལས་བྱུང་ཞིང་། སྐར་རྩིས་གཞུང་ལས་རྒྱུ་སྐར་ཆུ་ཚོད་ཆིག་སྟོང་དང་དྲུག་བརྒྱ་ཉི་ཤུར་བགོས་ཡོད་ཅིང་། རྒྱ་རྩིས་ལས་མཐོང་སྣང་ལ་ཉི་མ་གོ་ལར་སྐོར་བ་བྱེད་པ་ཞིག་དང་འདྲ་བར་སྣང་བའི་ལམ་ཐིག་དེ་ལ་སེར་ལམ་ཞེས་བཏགས་ཏེ། སེར་ལམ་ཟླུམ་བོར་འཁྲིལ་བའི་ལམ་ཐིག་དེ་རྟོག་བཟོས་ཆ་སུམ་བརྒྱ་དང་དྲུག་ཅུར་བགོས་ཏེ། ཆ་བཅོ་ལྔ་རེའི་མཚམས་སུ་དབུགས་སྒང་རེ་འཁེལ་བར་བྱས་པ་ན། ཉི་མ་དེ་རྫོགས་པར་བགྲོད་པ་ལ་ལོ་གཅིག་དགོས་པ་ཡིན་ནོ། །དེ་ཡང་སེར་ལམ་གྱི་འགོ་འཛུགས་པའི་ཐིག་གི་སྟེང་དཔྱིད་མཉམ། དེ་ནས་ཆ་དགུ་བཅུའི་སྟེང་དབྱར་ཉི་ལྡོག དེ་ནས་ཆ་བརྒྱ་དང་བརྒྱད་ཅུའི་སྟེང་སྟོན་མཉམ། དེ་ནས་ཆ་ཉིས་བརྒྱ་བདུན་ཅུའི་སྟེང་དགུན་ཉི་ལྡོག་འབྱུང་ཞིང་། དེ་བཞིན་དབུགས་སྒང་ལྷག་མ་རྣམས་ཀྱང་རང་རང་གི་ཆ་གང་ཡིན་པ་དེ་ལ་ནམ་ཡང་དབང་བས་ན། དུས་བཞི་མི་འགྱུར་གནད་ཀྱི་གཟེར་ཞེས་པའང་འདི་ལས་འཕྲོས་པ་ཤེས་ནུས་སོ། །དེས་ན་འདི་དག་ངོས་ཟིན་པ་ལ་བརྟེན་ནས་ད་ནི་སྐབས་སུ་བབ་པའི་ལོ་འགོ་འཛིན་ཚུལ་ལ་དཔྱད་པར་བྱའོ།།

སྤྱིར་ལོ་འགོ་འཛིན་ཚུལ་ཐད་འདྲ་མིན་སྣ་ཚོགས་ཤིག་ཡོད་ན་ཡང་འདིར་འབྱུང་རྩིས་ལོ་འགོ་འཛིན་ཚུལ་ལ་ཅུང་ཙམ་དཔྱད་ན། བོད་ཟླ་བཅུ་གཅིག་པར་འབྱུང་རྩིས་ཀྱི་ལོ་འགོ་བཟུང་བ་དེ་ལ་ལུང་གི་རྒྱབ་བརྟེན་དང་རིག་པའི་སྒྲུབ་བྱེད་མང་བོས་འཚང་ཁ་རྒྱག་པར་མ་ཟད། ཕྱི་རོལ་ཁོར་ཡུག་གི་མཐོང་སྣང་དང་ཡང་མི་མཐུན་པའི་ཚུལ་ནི། དཔེར་ན། ཤིང་སྡོང་ཞིག་ལ་དཔེར་བླངས་ནས་བཤད་ན་ཤིང་ལ་ཆུ་རྒྱུགས་ནས་ལོ་མ་རིམ་གྱིས་འབུས་པའི་དུས་དེ་ལ་དཔྱིད་ཀ་དང་།  དེ་ནས་ཤིང་ལོ་ལྗང་ཁུར་གྱུར་བའི་དུས་དེ་དབྱར་ཁ། དེ་ནས་ལོ་མ་སེར་བོར་གྱུར་བའི་ཚེ་སྟོན་ཀ་དང་། ལོ་མ་ས་ལ་ཟགས་ནས་ཤིང་སྡོང་སྐྱ་ཧྲང་ཧྲང་བྱེད་པའི་དུས་དེ་ལ་དགུན་ཁར་ངོས་འཛིན་དགོས་པ་ནི། རྔ་རྒོད་ནམ་མཁའ་སེང་གེས་མཛད་པའི་<<སྐར་ཡིག་དགོས་འདོད་ཀུན་སྟེར་>>ཞེས་པ་ལས། ཅེས་དང་གསོ་བྱེད་ཕྱི་རྒྱུད་ལས། །ཉི་མ་གར་ལོག་དབྱར་དགུན་འབྲིང་། །ཞེས་དང་དེ་ལས་དཔྱིད་ཟླ་གསུམ། །ཤིང་རྩི་ཁ་འབུས་དུས་དང་ནི། །རྟ་དང་དབོ་དང་ནག་པ་ཡིས། །ནམ་ཚོད་འཛིན་སོགས་གསུངས་པ་དང་། །ཞེས་དཔྱིད་དུས་སུ་ཤིང་རྩི་ཁ་འབུས་པ་སོགས་གསུངས་པ་དང་། དཔྱིད་དུས་ཞེས་པའང་ཟླ་བ་དང་བོའི་དབུགས་ཐོབ་པ་ནས་འཇོག་དགོས་ཏེ། ཟླ་བ་དང་བོའི་དབུགས་ཐོབ་པ་ལ་དཔྱིད་ཟུག་ཅེས་བརྗོད་པ་དང་། ཉིན་དེར་རྒྱས་ས་གླང་བརྟག་པའི་སྲོལ་ཡང་ཡོད་པ་ནི། <<རིག་ལྡན་སྙིང་ཐིག་>>ལས། དེ་ནས་རྒྱ་ནག་ས་གླང་ནི། །བརྟག་པའི་རྩིས་ཀྱི་ཆོ་ག་ལས། །དཔྱིད་དབུགས་གང་ཟིན་དུས་ཚོད་སོགས། །འཁྲུལ་མེད་རྟོགས་པ་མན་ངག་གནད། །ཅེས་པ་ལྟར་རོ། །དེས་ན་དཔྱིད་ཟླ་ར་བ་བཅུ་གཅིག་པར་བཟུང་ན་འཇིག་རྟེན་དངོས་ཡོད་མཐོང་སྣང་གི་དུས་ཚིགས་ཤིག་ཡོད་པ་འདི་དང་ཡང་འགལ་བར་འགྱུར་བའི་ཚུལ་ནི། ཀློང་རྡོལ་བླ་མ་ངག་དབང་བློ་བཟང་གིས་མཛད་པའི་<<བཟོ་དང་གསོ་བ། སྐར་རྩིས་རྣམས་ལས་བྱུང་བའི་མིང་གི་རྣམ་གྲངས་>>ཞེས་པ་ལས། ནག་རྩིས་ཀྱི་ལོ་འགོ་ཟླ་བ་བཅུ་གཅིག་པ་ནས་འཛིན་ཟེར་ཡང་། དེ་ལྟར་བྱས་ན་འཇིག་རྟེན་གྱི་ལུགས་ལ་མི་མཐུན་ཏེ། དཔྱིད་དུས་དབྱར་དུས། སྟོན་དུས་དགུན་དུས་ཡིན་ཟེར་དགོས་པས་མི་བཟང་། མདོ་སྡེ་གསེར་འོད་སྨན་གྱི་རྒྱུད་ཐམས་ཅད་དང་མཐུན་པ་ཧོར་རྒྱལ་པོའི་ལུགས་ཀྱི་ད་ལྟ་ཡོངས་སུ་གྲགས་པའི་ལུགས་འདི་བཟང་། སྔོན་དུས་ནག་རྩིས་པས་དེ་ལྟར་བཟུང་བ་ཡིན་ནོ། །ཞེས་དང་། ཡང་རྔ་རྒོད་ནམ་མཁའ་སེང་གེས་མཛད་པའི་<<སྐར་ཡིག་དགོས་འདོད་ཀུན་འབྱུང་>>ལས། སློབ་དཔོན་ཀུན་དགའ་དཔལ་བས་ཀྱང་། །ཧོར་ཟླ་དང་བོ་དཔྱིད་ར་སྟག །མཆུ་ཡིས་ཉ་བའི་ཟླ་བ་ལ། །འགྲོ་མགོན་འཕགས་པ་རྒྱ་ཕྲུག་དང་། །ཟུར་མཁར་བློ་གྲོས་རྒྱལ་བོ་སོགས། །རྣམ་མང་མཁས་པའི་བཞེད་པ་དང་། །འཇིག་རྟེན་སྤྱིར་གྲགས་དུས་བཞིའི་གཟེར། །དང་མཐུན་ཧོར་ཟླ་དང་བོ་ནི། །དཔྱིད་ར་སྟག་ཟླ་བྱས་ཏེ་དེའི། །དབུགས་ཐོབ་ཉི་མ་བུམ་ཁྱིམ་ལ། །འཕོ་ཉིན་ཐེ་སེ་རྒྱལ་སོགས་ཀྱི། །བཞོན་པའང་སྤོ་བར་བཞེད་པ་ཡིས། །རྗེས་སུ་འབྲང་སྟེ་དེ་ཡི་ལུགས། །ལོ་ཟླ་ཞག་དང་དུས་ཚོད་ཀྱི། །ས་བདག་གནས་རྒྱུའི་འཁོར་ཡིག་དང་། །ཚེས་ཉི་གཟའ་སྐར་འཕྲོད་སྦྱོར་དང་། །དབྱངས་འཆར་བྱེད་པ་བཅུ་གཅིག་དང་། །རྟེན་འབྲེལ་སྤར་སྨེ་དུས་སྦྱོར་དང་། །གནམ་སྒོ་ཟླ་ཞག་ཉི་མ་ནག །པི་ལིང་ཟིན་ཕུང་ཟོར་ཐོགས་སོགས། །ཚེས་རྒྱུའི་ས་བདག་ཇི་སྙེད་ཀྱི། །རྒྱུ་གནས་འབྲས་བཤད་བཅོས་ཐབས་སོགས། །མ་ནོར་གསལ་བར་ལུང་སྟོན་པའི། །སྐར་ཡིག་དགོས་འདོད་ཀུན་སྟེར་དཔལ། །བློ་གསལ་དགའ་བ་བསྐྱེད་པ་ཡི། །བླང་དོར་ཀུན་གསལ་མེ་ལོང་བྲི། །ཞེས་པའི་ལུང་འདིས་ལོ་གསར་རམ་ལོ་འགོ་ཟླ་བ་དང་བོར་འཛིན་པ་ནི་འཇིག་རྟེན་གྱི་གྲགས་པ་དང་མཁས་མང་གི་བཞེད་པ། དུས་གཟེར་ཉེར་བཞི་དང་ཡང་མཐུན་པར་གསུངས་ཡོད་པར་མ་ཚད། ཟླ་བ་བཅུ་གཅིག་པར་ས་བདག་འཕོ་སྟབས་ལོ་འགོ་ཡང་དེ་ནས་འཛིན་དགོས། ཞེས་པའི་བཞེད་ཚུལ་དེ་ཡང་དཔག་ཚད་ཁ་ཤས་སུ་རྒྱང་ཕུད་བཏང་འདུག་པའང་ཤེས་པར་བྱའོ། །ཡང་ན། འབྱུང་རྩིས་རྒྱ་ནག་ནས་དར་བས་ཕྱིའི་གནམ་གཤིས་ཀྱི་འགྱུར་བ་དང་བསྟུན་འདུག་ཅེས་ནའང་། མ་ཡིན་ཏེ་རྒྱ་ནག་གི་གནམ་གཤིས་ང་རང་ལ་རྒྱུས་ཡོད་པས། ཟླ་བ་བཅུ་གཅིག་པ་དགུན་ཟླ་འབྲིང་བོ་ལས་དཔྱིད་ཟླ་ར་བར་ནམ་ཡང་འཛིན་ཐབས་མེད་པར་མ་ཟད། རྒྱ་ནག་ལ་དགུན་ཉི་ལྡོག་ནས་དགུ་དགུ་གྱ་གཅིག་འདྲེན་ཚུལ་ཡོད་པ་དེས་ཀྱང་ར་འཕྲོད་པ་དང་། དགུན་འདྲེན་ཚུལ་དེ་ནི་སྔོན་མ་ནས་སྤྱི་ཚོགས་ནང་ཧ་ཅང་དར་ཁྱབ་ཆེ་སྟབས། ཁ་སང་དེ་རིང་ཡང་དམངས་ཁྲོད་དུ་ཡིག་རིགས་གཅིག་ཀྱང་མི་ཤེས་མཁན་དེ་ཚོས་ཀྱང་གྲང་ངར་ཆེ་ཆུང་དང་དྲོད་སོགས་ནམ་སླེབས་མིན་དགུ་བགྲངས་ཏེ་ཧ་གོ་བཞིན་པ་དེ་དང་། དགུ་འདྲེན་ཚུལ་ནི། དགུ་དང་བོ་ལ་ས་འགད། དགུ་གཉིས་པ་ལ་རྡོ་འགད། དགུ་གསུམ་པ་ལ་ལྕགས་ཀྱི་ཐུ་ལུམ་འགད། (སྤྱིར་ཐུ་ལུམ་ཞེས་པ་གོང་བུའི་མིང་དང་། སྐབས་འདིར་བྱ་གོ་བའི་སྒོ་ང་ལ་གོ་དགོས། རྒྱུ་མཚན་ནི་གོ་བའི་སྒོ་ང་དེ་ཧ་ཅང་མཁྲེགས་པོ་ཡིན་པས་ཁ་བཀད་པའི་ཚེ་ན་གོ་མས་གཤོག་པ་ཆུ་ལ་གཤེར་ཏེ། དར་ཆགས་ཚེ་སྒོ་ངའི་སྟེང་བཞུས་ནས་བརྡོལ་བར་བྱེད་པས་ན།) དགུ་བཞི་བ་ལ་ཕོ་སྤྱང་གི་གདོང་འགད། (འདིའི་སྐབས་ཀྱི་གདོང་ནི་ཕོ་རྟགས་ལ་གོ་དགོས།) དགུ་ལྔ་བ་ལ་མོ་སྤྱང་གི་ནུ་མ་འགད། དགུ་དྲུག་པར་དྲོད་མེ་སྟག་ཙམ་ཞིག་རི་རབ་ཀྱི་རྩེ་ནས་རྒྱ་མཚོའི་གཏིང་བར་དུ་འགྲོ། དགུ་བདུན་པ་ལ་རྐང་ཐང་རྐང་གི་ལྷམ་ཕུད། དགུ་བརྒྱད་པ་ལ་སྐྱ་མིའི་མགོ་ཡི་ཞྭ་ཕུད་སོགས་ཚང་མའི་ངག་ལ་རྒྱུན་འཇགས་སུ་གནས་ཡོད་པ་དེ་ལ་གཞིགས་ནའང་། དུས་དེ་ནམ་ཟླ་དཔྱིད་ཀར་མི་འགྲོ་བར་མ་ཟད། དགུན་ཁའི་ཡང་སྒང་ངམ་དཀྱིལ་ཞིག་ཡིན་པ་ཤེས་ནུས་པས། ཁྱེད་རང་གིས་རྩིས་མི་ཤེས་མཁན་ཞིག་ལ་ཟླ་བ་བཅུ་གཅིག་པ་དཔྱིད་ཟླ་ར་བ་རེད་ཅེས་སྨྲ་ཚེ། ཁས་ལེན་པ་ཕར་ཞོག་གད་མོ་རི་འདར་བ་ཞིག་དང་ལྷན། ཁྱེད་རང་ཅི་ཡང་མི་ཤེས་མཁན་ཞིག་ཏུ་ངོས་འཛིན་བྱེད་རྒྱུ་ནི་གོར་མ་ཆགས་ཤིང་། དམིགས་བསལ་གྱིས་དགོས་པའང་མི་མཐོང་ལ། དངོས་ཡོད་དུས་ཚིགས་ཀྱི་འགྱུར་བ་དང་ཡང་གོ་ལྡོག་པའི་ཚུལ་ནི། ཀློང་རྡོལ་བླ་མ་རིན་པོ་ཆེའི་མིང་གི་རྣམ་གྲངས་ལས་གོང་དུ་དྲངས་པ་ལྟར། དེ་ལྟར་བྱས་ན་འཇིག་རྟེན་གྱི་ལུགས་དང་མི་མཐུན་ཏེ། དཔྱིད་དུས་དབྱར་དུས། སྟོན་དུས་དགུན་དུས་ཡིན་ཟེར་དགོས་པས་མི་བཟང་། ཞེས་གསུངས་པ་ལྟར་དུས་ཚིགས་བཞི་འཁྲུགས་ན། དུས་གཟེར་ཉེར་བཞིའམ་དུས་ཚིགས་ཉེར་བཞིས་ལོ་གཅིག་གི་རིང་དྲོད་གྲང་ཆེ་ཆུང་དང་། སོ་ནམ་བྱེད་ལུགས་སྔ་འཕྱི། གནམ་གཤིས་ཀྱི་འགྱུར་ལྡོག་སོགས་བསྟན་པ་ཚང་མ་འཁྲུགས་འགྲོ་བས། ཟླ་བ་དང་བོ་དེ་དཔྱིད་ཟླ་ར་བ་བྱས་ནས་དེའི་ཚེས་གཅིག་ལ་ལོ་འགོ་བཟུང་ཚེ། འཇིག་རྟེན་ཡོངས་གྲགས་དང་རྩིས་ཀྱི་གཞུང་ལུགས་གང་ལ་ཡང་མཐུན་པ་ནི། རྔ་རྒོད་ནམ་མཁའ་སེང་གེས་མཛད་པའི་<<སྐར་ཡིག་བློ་གསལ་དགའ་བསྐྱེད་བླང་དོར་གསལ་བའི་མེ་ལོང་ལས་སྐར་ཁྲ་འབྲས་བཤད་ཅེས་པའི་ལེ་ཚན་>>ཞེས་པ་ལས་བོད་ཟླ་དང་བོའི་ཟླ་བཤད་ནི། ཧོར་ཟླ་དང་བོ། དུས་འཁོར་དཔྱིད་ར། མཆུའི་ཟླ་བ། ཡར་ངོ་སྔོན་འགྲོ། ཧོར་ལུགས་གསོ་བྱེད་མདོ་བྱང་སོགས་ཀྱི་ལོ་འགོ་འཁྲུལ་མེད། ཁམས་དང་སྟག་གྲ་རྒྱས་ངར་སྐད་འདོན་ཞིང་རྒྱུག་པས་སྟག་ཟླ་ཆེ་ཆུང་བལྟ། དབུགས་ཐོབ་ཚེ་ཉི་མ་བུམ་ཁྱིམ་ལ་འཕོ། དེའི་ཉིན་བསད་ལས་འགྲུབ། ས་བདག་ཐེ་སེ་བཞོན་པ་སྤོ། དཔྱིད་འགོ་ཚུགས། ངང་བ་འདམ་ནས་འདོན། རྒྱ་ནག་ས་གླང་བརྟག བདུན་ངན་དགུ་འཛོམས་ཞེས་པ་སོགས་ཚང་མ་ཟླ་བ་དང་བོའི་ནང་ཁེལ་ཡོད་པས། ཟླ་ཐོས་སོགས་འདོན་སྐབས་ཀྱང་གཞུང་འདི་ཉིད་གཞིར་བཟུང་ནས་ཟླ་བཤད་བརྒྱབ་ཚེ། དགུན་དཀྱིལ་ཞིག་ལ་དཔྱིད་ཟླ་ར་བར་ངོས་ཅི་ལྟར་བཟུང་བ་ཡིན་ནམ་སྙམ་པའི་ཐེ་ཚོམ་ཡང་སྐྱེ་མི་དགོས་ལ། ཕྱི་རོལ་གནམ་གཤིས་ཀྱི་འགྱུར་བ་དང་ཡང་མཐུན་པས་སྐྱོན་མེད་པར་མ་ཟད། དགེ་མཚན་བླ་ན་མེད་པ་ཞིག་ལ་ངོས་འཛིན་བྱེད་ངེས་སོ།།

འདི་ནི་ཕྱི་ལོ་ ༡༩༩༧ ལོར་བོད་གཞུང་སྨན་རྩིས་ཁང་གིས་པར་བཏབ་པའི་དེབ་ <<བོད་རྒྱལ་ཡོངས་རྩིས་པའི་ཚོགས་ཆེན་ཐེངས་དང་པོའི་སྐབས་ཀྱི་གསུང་བཤད་དང་དཔྱད་རྩོམ་ཕྱོགས་བསྒྲིགས།>> ཞེས་པ་ནས་ཟུར་བཏོན་ཞུས་པ་ཡིན།

མཐའ་མའི་འདོན་ཐེངས་།: 07.07.2014 ཉིན། 9:22 AM